پیرس: پیرس ایئر شو کے منتظمین نے متعدد اسرائیلی اسلحہ ساز کمپنیوں کو ’’جارحانہ ہتھیاروں‘‘ کی نمائش پر شو میں شرکت سے روک دیا ہے۔

غیر ملکی خبر رساں ادارے کے مطابق پیرس ایئر شو میں اسرائیلی کمپنیوں کے اسٹالز کو بڑے سیاہ پردوں سے ڈھانپ دیا گیا جن میں اسرائیل ایرو اسپیس انڈسٹریز (IAI)، رافائل اور ایل بٹ سسٹمز شامل ہیں۔

خبر رساں ادارے کا کہنا ہے کہ منتظمین نے یہ فیصلہ اس وقت کیا جب معلوم ہوا کہ ان کمپنیوں کی طرف سے نمائش کیے گئے ہتھیار شو کے قواعد و ضوابط کی خلاف ورزی کررہے ہیں۔

رپورٹ میں کہا گیا ہے کہ ’’ان کمپنیوں میں سے بعض اسرائیلی فوج کو ایسے ہتھیار فراہم کرتی ہیں جو غزہ میں استعمال ہوتے ہیں، جیسے جدید ترین ڈرون سسٹمز وغیرہ۔

رپورٹ کے مطابق رافائل کمپنی کے ایک اعلیٰ عہدیدار نے اپنے اسٹال کو مکمل طور پر ڈھانپے جانے پر حیرت اور صدمے کا اظہار کیا ہے۔

اعلیٰ عہدیدار کا کہنا تھا کہ انہیں اس فیصلے کے بارے میں کوئی پیشگی اطلاع نہیں دی گئی جب کہ رافائل کمپنی نے اس فیصلے پر سخت ناراضگی کا اظہار کیا ہے۔

اسرائیلی وزارت دفاع نے اس فیصلے کو تنقید کا نشانہ بناتے ہوئے کہا ہے کہ یہ اسرائیلی کمپنیوں کے خلاف ’’تفریق‘‘ کی ایک مثال ہے۔

وزارت کے بیان میں مزید کہا گیا ہے کہ یہ ایک شرمناک اور بے مثال فیصلہ ہے جو واضح طور پر سیاسی اور تجارتی مقاصد پر مبنی ہے۔