واشنگٹن: امریکی وزیر دفاع پیٹ ہیگستھ اور چیئرمین جوائنٹ چیفس آف اسٹاف جنرل ڈین کین نے پینٹاگون میں ایک اہم نیوز بریفنگ کے دوران دعویٰ کیا ہے کہ ایران کی جانب سے قطر میں قائم امریکی تنصیبات پر کیے گئے حملے کو کامیابی سے ناکام بنایا گیا جب کہ امریکہ نے ایران کی جوہری تنصیبات پر تاریخی حملہ کرکے انہیں مکمل طور پر تباہ کردیا۔

جنرل ڈین کین نے کہا کہ ایران نے قطر میں امریکی اہداف کو نشانہ بنانے کی کوشش کی تاہم امریکا کو پہلے سے اطلاع مل چکی تھی اور حملے کے جواب کے لیے صرف 2 منٹ کا وقت تھا جس میں امریکی افواج نے بروقت ردعمل دے کر خطرے کو ناکام بنایا۔

انہوں نے کہا کہ یہ واقعہ امریکی دفاعی نظام کی مضبوطی اور صلاحیتوں کا واضح ثبوت ہے۔ امریکا نے ایران کے بڑے حملے کے جواب میں بڑی تعداد میں میزائل فائر کیے تاہم حفاظتی وجوہات کی بنا پر اس تعداد کی تفصیل نہیں دی جاسکتی۔

متعلقہ خبر: نیٹو چیف مارک روٹے ٹرمپ کو ’’ڈیڈی‘‘ کیوں کہتے ہیں ؟

دوسری جانب امریکی وزیر دفاع پیٹ ہیگستھ نے اس موقع پر صدر ڈونلڈ ٹرمپ کے کردار کو سراہتے ہوئے کہا کہ اس تاریخی فوجی آپریشن کی کامیابی صرف صدر ٹرمپ کی جرات مندانہ قیادت کی وجہ سے ممکن ہوئی۔

ان کا کہنا تھا کہ امریکی افواج نے انتہائی مہارت اور پیشہ ورانہ انداز میں مشن مکمل کیا جس کا مقصد خطے میں جاری جنگ کو ختم کرنا تھا۔

پیٹ ہیگستھ نے انکشاف کیا کہ امریکا نے ایران میں واقع جوہری تنصیبات پر انتہائی کامیاب حملہ کیا جس کے نتیجے میں انہیں شدید نقصان پہنچا۔ عالمی ایٹمی توانائی ایجنسی نے بھی اس بات کی تصدیق کی ہے کہ ایرانی جوہری تنصیبات کو نمایاں نقصان پہنچا ہے۔

وزیر دفاع نے دعویٰ کیا کہ ایران کے ایٹمی پروگرام کی تباہی وہ خواب تھا جو کسی بھی امریکی صدر کے لیے ایک تاریخی موقع ہو سکتا تھا اور صدر ٹرمپ نے اسے حقیقت میں بدل کر دکھایا۔

پیٹ ہیگستھ نے امریکی میڈیا پر بھی تنقید کی اور کہا کہ بعض میڈیا ادارے صدر ٹرمپ کی مخالفت برائے مخالفت کررہے ہیں اور من گھڑت خبریں چلا رہے ہیں۔ صدر ٹرمپ جو بھی کرتے ہیں، میڈیا اس کی مخالفت ہی کرتا ہے۔

انہوں نے یہ بھی کہا کہ اس تاریخی کامیابی پر امریکی عوام کو جشن منانا چاہیے تھا لیکن بدقسمتی سے میڈیا نے اس قومی فتح کو سیاسی تنازع بنادیا۔

وزیر دفاع نے مزید کہا کہ اس سے پہلے کسی امریکی صدر کو اس قسم کے آپریشن کی اجازت نہیں دی گئی تھی اور یہ پہلی مرتبہ ہے کہ امریکی فوج نے براہ راست اور اتنی مہارت سے ایک بڑا آپریشن مکمل کیا ہے جس کا نتیجہ ایران اور اسرائیل کے درمیان جنگ بندی کی صورت میں سامنے آیا۔