مودی سرکار پر جنگی جنون طاری ہے اور خطے میں اسلحے کے حصول کے لیے نئے معاہدے کیے جارہے ہیں، جس کے لیے کثیر رقم خرچ کی جارہی ہے۔

اس ضمن میں بھارتی وزارت دفاع نے 30 ہزار کروڑ روپے مالیت کے دفاعی نظام کی خریداری کی تجویز منظوری کیلئے پیش کردی ہے۔

تجویز کے مطابق بھارتی فوج کیلئےکوئیک ری ایکشن سرفیس-ٹو-ائیر میزائیل سسٹم خریداری کی منظوری لی جائیگی۔

بھارتی نیوز ایجنسی اے این آئی نیوز کے مطابق ’’اس دفاعی نظام کی مالیت تقریباً 30 ہزار کروڑ روپے ہے۔‘‘

یہ بھی پڑھیں: بھارت کا بڑھتا ہوا دفاعی بجٹ اور پاکستان کی دفاعی ضروریات

اے این آئی نیوز کا کہنا ہے کہ یہ فیصلہ بھارتی فوج کی فضائی دفاعی صلاحیتوں کو مزید مضبوط بنانے کے لیے لیا گیا ہے، دفاعی نظام QRSAM  کی رینج 30 کلومیٹر تک ہے۔

یہ نظام موبائل ہے اور 360 ڈگری ریڈار کوریج فراہم کرتا ہے، یہ جدید نظام ڈی آر ڈی او، بی ای ایل اور بی ڈی ایل کی مشترکہ کاوشوں کا نتیجہ ہے۔

اے این آئی نیوز نے بتایا کہ دفاعی نظام QRSAM ڈرونز، ایئرکرافٹ اور کروز میزائلز کیخلاف 24 گھنٹے آپرشنل رہ سکتا ہے، دفاعی نظام کے حصول کی منظوری ثابت کرتی ہے کہ بھارتی حکومت جنگی جنون میں مبتلا ہے۔

آپریشن سندور میں ناکامی کے بعد بھارت کی بڑے پیمانے پر اسلحے کی خریداری خطے کے امن کیلئے بڑاخطرہ ہے۔

حکومت پاکستان اس بات کو واضع کر چکی ہے کہ بھارت نے جارحیت کی تو پاکستان اپنے دفاع میں بھر پور جوابی وار کرے گا۔