ایران نے میسجنگ ایپ واٹس ایپ پر سنگین الزام عائد کرتے ہوئے دعویٰ کیا ہے کہ یہ پلیٹ فارم صارفین کا ذاتی ڈیٹا جمع کر کے اسرائیل کو فراہم کر رہا ہے۔

ایرانی سرکاری میڈیا کی اس رپورٹ کے بعد ایرانی سرکاری ٹیلی ویژن نے عوام سے اپیل کی ہے کہ وہ فوری طور پر واٹس ایپ کو اپنے موبائل فونز سے ڈیلیٹ کر دیں۔

دوسری جانب پیغام رسانی کی عالمی شہرت یافتہ ایپ واٹس ایپ نے ایران میں اس کے خلاف چلائی جانے والی مبینہ مہم پر شدید تحفظات کا اظہار کرتے ہوئے کہا کہ کمپنی ایرانی میڈیا کی جانب سے لگائے گئے الزامات بے بنیاد اور گمراہ کن ہیں۔

میٹا کی ملکیت میں کام کرنے والی اس ایپ نے اپنے بیان میں کہا کہ ہم ان جھوٹے الزامات پر گہری تشویش رکھتے ہیں، خدشہ ہے کہ یہ مہم ہماری سروس کو ایران میں بند کرنے کا جواز نہ بن جائے، خاص طور پر اس وقت جب لوگ آپس میں رابطے کے لیے ہم پر انحصار کر رہے ہیں۔

واٹس ایپ کا مزید کہنا تھا کہ ہم نہ تو صارفین کی مخصوص لوکیشن ٹریک کرتے ہیں، نہ ہی کالز یا پیغامات کا ریکارڈ رکھتے ہیں اور نہ ہی کسی کے نجی پیغامات کو پڑھتے ہیں۔

کمپنی نے واضح الفاظ میں کہا کہ وہ کسی بھی حکومت کو بلک ڈیٹا فراہم نہیں کرتی۔

واضح رہے کہ واٹس ایپ دنیا بھر میں اپنی اینڈ ٹو اینڈ انکرپشن پالیسی کے باعث جانی جاتی ہے، جس کے تحت صارفین کے پیغامات صرف بھیجنے اور وصول کرنے والے افراد ہی پڑھ سکتے ہیں، حتیٰ کہ خود واٹس ایپ کو بھی ان تک رسائی حاصل نہیں ہوتی۔