واشنگٹن: امریکی صدر ڈونلڈ ٹرمپ نے پیر کے روز وکٹری 45-47 نام کے پرفیومز کی نئی رینج متعارف کرا دی ہے۔

اس پرفیوم کی سب سے خاص بات بوتل پر ڈونلڈ ٹرمپ کا خوبصورت طلائی مجسمہ کا موجود ہونا ہے، ٹرمپ نے اپنے حامیوں سے اپیل کی ہے کہ وہ یہ خوشبو خود بھی خریدیں اور اپنے پیاروں کو  بھی تحفے میں دیں۔

یہ پرفیومز اُن مختلف مصنوعات کا حصہ ہیں جن پر ٹرمپ کی ذاتی برانڈنگ موجود ہے اور جنہیں وہ اپنی ممکنہ انتخابی مہم کے لیے فنڈنگ کے طور پر استعمال کر رہے ہیں۔

ٹرمپ کے مطابق یہ پرفیومز “فتح، طاقت اور کامیابی” کی علامت ہیں اور یہ مرد و خواتین دونوں کے لیے دستیاب ہیں۔ انہوں نے اپنے فالورز کو مشورہ دیا کہ وہ خود بھی ایک بوتل خریدیں اور اپنے چاہنے والوں کو بھی تحفے میں دیں۔ انہوں نے پیغام کے اختتام پر خوشی، لطف اور جیت کے جذبے کو برقرار رکھنے کی تلقین کی۔

واضح رہے کہ یہ خوشبومرد حضرات اور خواتین دنوں کے لیے علحیدہ ورژنز میں دستیاب ہے، اور ہر 100 ملی لیٹر بوتل کی قیمت 249 ڈالر مقرر کی گئی ہے۔

برانڈ کی ویب سائٹ پر مردوں کے لیے مخصوص خوشبو کو “طاقتور، مردانہ خوشبو جس کی خوشبو دیرپا اور شائستہ ہو” کے طور پر بیان کیا گیا ہے، اور یہ ان مردوں کے لیے بنائی گئی ہے “جو طاقت، اعتماد اور مقصد کے ساتھ زندگی گزارتے ہیں۔”

خواتین کے لیے مخصوص “او ڈی پرفیوم” کو “نفیس، ہلکی مگر پرکشش خوشبو” کے طور پر بیان کیا گیا ہے، جسے “اعتماد، خوبصورتی اور ناقابلِ شکست عزم” کی نمائندہ قرار دیا گیا ہے۔

ٹرمپ فریگرینس وہی کمپنی تیار کر رہی ہے جو اس سے قبل ٹرمپ اسنیکرز اور ٹرمپ بائبلز فروخت کر چکی ہے۔

اسی کمپنی نے مرد حضرات اورخواتین دونوں کے لیے، فائٹ فائٹ فائٹ نامی ایک اور خوشبو بھی متعارف کرائی ہے، جس کی بوتل پر ٹرمپ کے دستخط موجود ہیں۔ اس سے قبل ایک پرفیوم ایسا بھی لانچ کیا گیا تھا جس پر ٹرمپ کے سنہری مجسمے کا ڈھکن لگا تھا۔ یاد رہے، ٹرمپ نے دسمبر 2024 میں اس نئے پرفیوم کا اعلان کیا تھا، جوکہ ان کے پہلے پرفیوم کا تسلسل ہے۔

تاہم، ویب سائٹ کے نچلے حصے میں چھوٹے الفاظ میں درج ایک نوٹس کے مطابق “ٹرمپ فریگرینس کو ڈونلڈ جے ٹرمپ، ٹرمپ آرگنائزیشن، یا ان کے کسی بھی ذیلی ادارے یا نمائندے نے ڈیزائن، تیار، تقسیم یا فروخت نہیں کیا ہے۔ ایل سی سی 45 فٹ ویئر، ٹرمپ کے نام، تصویر اور مشابہت کو ایک لائسنس معاہدے کے تحت استعمال کرتا ہے، جسے شرائط کے مطابق منسوخ یا واپس لیا جا سکتا ہے۔ GetTrumpFragrances.com  کا کسی سیاسی مہم سے کوئی تعلق نہیں ہے۔”

یہ نئی پراڈکٹ ایک جانب برانڈ مارکیٹنگ کی مہم کا حصہ ہے، تو دوسری جانب اسے امریکی صدر کے حامیوں کے لیے ایک یادگار اور جذباتی لگاؤ علامت کے طور پر بھی پیش کیا جارہا ہے، جس میں خوشبو کے ساتھ وفاداری بھی شامل ہے۔