وفاقی وزیر برائے سائنس اینڈ ٹیکنالوجی فواد چوہدری کا غیر ملکی ادارے کو انٹرویو کا معاملہ کابینہ پہنچ گیا جس پر وزیر اعظم نے تمام کابینہ ممبران  کو متنازعہ بیانات سے روک دیا ہے۔

تفصیلات کے مطابق وفاقی وزیر فواد چوہدری  کی جانب سے غیر ملکی نشریاتی ادارے کو دیئے گئے انٹریو کی گونج  کابینہ اجلاس میں بھی سنائی دی گئی جس پر وزیر اعظم نے ہدایت کی ہے کہ آئندہ متنازعہ بیانات سے پرہیز کیا جائے۔

وزیر سائنس و ٹیکنالوجی فواد چوہدری اجلاس میں وضاحتیں پیش کرتے رہے، انہوں نے کہا کہ ان کا بیان سیاق وسباق سے ہٹ کر چلایا گیا جبکہ انٹرویو میں ماضی میں ہونے والی صورتحال پر بات کی گئی تھی۔

وزیر اعظم نے تمام کابینہ ممبران  کو متنازعہ بیانات سے روک دیا، وزیراعظم کا کہنا تھا کہ آئندہ کوئی متنازعہ بیان نہ دیا جائے۔

دوسری جانب وزیراعظم کی موجودگی میں فیصل واوڈا نے ساتھی وزراء کو کھری کھری سناتے ہوئے کہا کہ وزراء کی نااہلی کی وجہ سے حکومت بدنام ہو رہی ہے۔

انہوں نے کہا کہ نااہل وزراء اپنے آپ کو وزیر اعظم سمجھنا شروع ہوگئے ہیں۔

فیصل واوڈا کابینہ اجلاس کے دوران وزیراعظم کے حق میں بولتے ہوئے غصے میں آگئے، انہوں نے نام لئے بغیر  متعدد وزراء  کے مختلف ایشوز پر نااہلی کو اجاگر کیا جبکہ وزیر اعظم اجلاس کے دوران فیصل واوڈا کو کابینہ اجلاس سے اٹھاکر دوسرے کمرے میں لے گئے اور وزیراعظم، فیصل واوڈا کو ریلیکس ہونے کی تلقین کرتے رہے۔