پاکستان کرکٹ بورڈ (پی سی بی کے چیف ایگزیکٹیو آفیسر (سی ای او) وسیم خان  کا کہنا ہے کہ ہمارے پاس متبادل کھلاڑی ہیں، انگلینڈ کا دورہ متاثر نہیں ہوگا۔

قومی کرکٹ ٹیم کے 10 کھلاڑیوں کے کورونا ٹیسٹ مثبت آنے کے بعد پی سی بی کے سی ای او وسیم خان نے ہنگامی پریس کانفرنس میں بتایا کہ تمام کھلاڑیوں کو گھروں میں آئسولیٹ کردیا گیا ہے،کھلاڑیوں کی عدم احتیاط وجہ بنی۔

چیف ایگزیکٹو پی سی بی  کا کہنا تھا کہ  ٹیسٹ مثبت آنے والے کھلاڑیوں میں سے 7 ٹی ٹوئنٹی ٹیم کے ہیں، محمد رضوان واحد کھلاڑی ہیں جو پہلا ٹیسٹ کھیلنے والے تھے۔

وسیم خان نے کہا کہ  ابھی سیریز شروع ہونے میں 6 ہفتے پڑے ہیں۔ ہمارے پاس متبادل کھلاڑی ہیں، ٹیم کا دورہ متاثر نہیں ہوگا۔

انہوں نے کہا کہ ہماری سوسائٹی میں سلیف آئسولیشن بہت کم ہے۔ دنیا بھر میں کورونا کو سنجیدہ لیا جارہا ہے لیکن ہماری  سوسائٹی میں کورونا کی سنجیدگی کو کرکٹرز نے بھی سنجیدہ نہیں لیا۔

چیف ایگزیکٹو پی سی بی   نے کہا کہ  مثبت آنے والے کھلاڑی دو بار منفی آگئے تو اسکواڈ میں شامل ہوسکتے ہیں۔ کل لاہور میں کھلاڑی اکھٹے ہورہے ہیں، وہاں دوبارہ ٹیسٹ ہوں گے۔

واضح رہے گذشتہ روز تین کھلاڑیوں حیدر علی، حارث رؤف اور شاداب خان کی کورونا رپورٹ مثبت آئی تھی جبکہ آج مزید سات کھلاڑیوں فخر زمان، عمران خان، محمد حفیظ، محمد حسنین ، محمد رضوان، کاشف بھٹی اور وہاب ریاض کورونا رپورٹ بھی مثبت آئی ہے۔