دفتر خارجہ نے مقبوضہ جموں و کشمیر میں نوجوانوں کے ماورائے عدالت قتل کی شدید الفاظ میں مذمت کی ہے۔

ترجمان دفتر خارجہ عائشہ فاروقی نے ہفتہ وار میڈیا بریفنگ میں  مقبوضہ جموں وکشمیر میں ہونے والے نوجوانوں کے ماورائے عدالت قتل کی مذمت  کی۔

ترجمان دفتر خارجہ نے کہا کہ  مقبوضہ کشمیر میں کشمیریوں کا قتل عام ہو رہا ہے۔ آج بھی بھارتی افواج نے کشمیری نوجوان کو شہید کیا جس کی مذمت کرتے ہیں۔

عائشہ فاروقی نےکہا کہ   لائن آف کنٹرول پر بھارت کی جانب سے خلاف ورزیاں مسلسل جاری ہیں۔بھارتی فورسز مسلسل شہری آبادی کو نشانہ بنا رہی ہیں۔

ان کا کہنا تھا کہ بھارت نے پاکستانی سفارتی عملے پر بے بنیاد الزامات عائد کیے ہیں۔ بھارت کی حالیہ کارروائیاں مقبوضہ کشمیر میں ظلم و ستم سے توجہ ہٹانے کی کوشش ہے۔

ترجمان دفتر خارجہ نے کہا کہ  اسلامی تعاون تنظیم کی رابطہ کمیٹی نے مقبوضہ کشمیر میں انسانی حقوق کی پامالی پر تشویش کا اظہار کرتے ہوئے  کشمیریوں کے حق خودارادیت کی حمایت کی ہے۔

عائشہ فاروقی نے بتایا کہ  سیکرٹری جنرل او آئی سی نے عالمی برادری سے انسانی حقوق کی پامالیوں کی تحقیقات کا مطالبہ بھی کیاہے۔

انہوں نے بتایا کہ  بھارتی افواج نے ابھی تک چھ ماہ میں 1440 مرتبہ جنگ بندی کی خلاف ورزیاں  کی ہیں۔ہم قابض بھارتی افواج کی نہتے شہریوں پر بلا اشتعال فائرنگ کی مذمت کرتے ہیں۔

ترجمان دفتر خارجہ نے کہا کہ  ہم بھارت کی جانب سے پاکستانی ہائی کمیشن کے اہلکاروں پر ویانا کنونشن کی خلاف ورزی کے الزامات کو مسترد کرتے ہیں۔ پاکستانی سفارت کار بین الاقوامی کنونشنز اور قوانین کے اندر رہ کر کام کر رہے تھے۔