وزیر خارجہ شاہ محمود قریشی کا کہنا ہے کہ  وزیر اعظم  عمران خان نے ریاست مدینہ کے اصولوں کو اجاگرکیا ہے۔

قومی اسمبلی کے اجلاس میں وزیر اعظم کے خطاب کے بعد پارلیمنٹ ہاؤس میں میڈیا سے گفتگوکرتے ہوئے  وزیر خارجہ شاہ محمودقریشی نے کہا کہ آج وزیر اعظم نے ایوان میں تمام ملکی امور پرمفصل گفتگو کی ہے۔

 وزیر خارجہ نے کہا کہ  آج وزیر اعظم نے بتا دیا  کہ کرسی کی کوئی اہمیت نہیں ہے۔ وزیر اعظم نے واضح پیغام دیا ہے ان کی کسی سے ذاتی مخالفت  بھی نہیں ہے۔

شاہ محمود قریشی کا کہنا تھا کہ وزیر اعظم نے قوم کو بتایا کہ ہماری حکومت کو معاشی طور پر ورثہ میں کیا ملاتھا۔ انہوں نے قوم کو آج مستقبل کا روڈمیپ دیا ہے۔

ان کا کہنا تھا کہ ہم خارجہ امور میں ذلت کے بھنور سے باہر نکلے ہیں۔ ہم نے منافقت کے بجائے دنیا کو امن کے لیے قائل کیا  اور کسی جنگ کا حصہ نہیں بنے۔

وزیر خارجہ نے کہا کہ ہم مسلم امہ کے اندر تقسیم کو ختم کر کے جوڑنے کی کوشش کر رہے ہیں۔مقبوضہ کشمیر کی عوامی لہر کا بھارت مقابلہ نہیں کر پائے گا۔

شاہ محمود قریشی  نے کہا کہ وزیر اعظم کی تقریر سے پی ٹی آئی کے کارکنان کے چہرے چمک اٹھے ہیں۔ آج کی تقریر سے پی ٹی آئی کارکنان کا نظریہ ایک بار پھر سے تازہ ہو گیاہے۔وزیر اعظم نے بتایا کہ احتساب کا عمل کتنا ضروری ہے اور کیسے نافذ کرنا ہے۔

انہوں نے کہا کہ  میں پی ٹی آئی کارکنان کو کہوں گا کہ حکومت چلی جائے لیکن نظریہ پر سمجھوتا نہیں ہو گا۔ پی ٹی آئی اراکین اسمبلی کی شکایات کا ازالہ کیا جائے گا۔

وزیر خارجہ کاکہنا تھا کہ پی ٹی آئی کا ایک بھی رکن اسمبلی ادھر ادھرنہیں ہو گا۔ تمام اراکین اسمبلی وزیر اعظم کی قیادت میں متحد ہیں۔