معاون خصوصی برائے سیاسی روابط ڈاکٹر شہباز گل نے کہا ہے کہ عمران خان پورے پاکستان اور خصوصاً نوجوانوں کے وزیراعظم اور امید ہیں۔

تفصیلات کے مطابق معاون خصوصی برائے سیاسی روابط ڈاکٹر شہباز گل نے بلاول زرداری کے بیان پر ردعمل دیتے ہوئے کہا کہ وزیراعظم کی وجہ سے اس وقت پاکستان کا نام پوری دنیا میں عزت سے لیا جا رہا ہے۔

معاون خصوصی برائے سیاسی روابط نے کہا کہ آپ لوگوں کی حکومتیں ملک کو بدنام کرنے میں ماہر ہیں ، آپ کے والد نے ملک کو کرپشن کے زاویے سے دنیا میں متعارف کروایا۔

ڈاکٹر شہباز گل نے یہ بھی کہا کہ ہم نے اپنی کامیاب خارجہ پالیسی کے زریعے بھارت کا مکروہ چہرہ دنیا کو دکھایا جبکہ ہم آپکے بنائے مسائل زدہ کانٹوں کو چنتے جا رہے ہیں۔

اپنے بیان میں معاون خصوصی برائے سیاسی روابط ڈاکٹر شہباز گل نے مزید کہا کہ عمران خان نے پہلی مرتبہ مافیا کو نتھ ڈالی آپ سمیت ہر فیلڈ کا مافیہ اس وقت اپنے آخری سانسیں لے رہے ہیں۔

بلاول بھٹو زرداری لاہور آتے ہی پی ٹی آئی حکومت پر برس پڑے

واضح رہے کہ پاکستان پیپلز پارٹی (پی پی پی) کے چیئرمین بلاول بھٹو زرداری نے لاہور میں پریس کانفرنس کرتے ہوئے کہا تھا کہ وزیراعظم آئین کے خلاف ہیں اور صوبوں اور عوام سے اختیارات اور وسائل چھین کر ون یونٹ لگانا چاہتی ہے۔

بلاول بھٹو زرداری نے کہا تھا کہ پی پی پی ہمیشہ مائنس ون کے خلاف رہی ہے ، مائنس ون ہمارا مطالبہ نہیں خود وزیراعظم یہ بات کر رہے ہیں۔

پاکستان پیپلز پارٹی (پی پی پی) کے چیئرمین نے یہ بھی کہا تھا کہ پی ٹی آئی کی حکومت صدر زرداری کو قتل کروانا چاہتی ہے جان بوجھ کر صدر زرداری کو حاضری سے استثنٰی نہیں دیا جا رہا، ہم این آر نہیں چاہتے ہیں ثبوت ہیں تو مقدمے چلائیں اور سزا دیں۔