وفاقی وزیر اطلاعات شبلی فراز کا کہنا ہے کہ  بلاول بھٹو نے اپنی پریس کانفرنس  میں خاصی گری ہوئی زبان استعمال کی ہے۔

بلاول بھٹوزرداری کی پریس کانفرنس پر رد عمل دیتے وفاقی وزیر اطلاعات شبلی فراز  کا کہنا تھا کہ  وزیراعظم اور ان کی ہمشیرہ کے بارے میں باتیں بلاول بھٹو کو زیب نہیں دیتیں۔ وہ اس قسم کی باتیں نہ کریں۔

وفاقی وزیر اطلاعات نے کہا کہ  وزیراعظم کی بہن کا سیاست سے کوئی تعلق نہیں ہے۔ خاتون کے بارے میں اس قسم کی باتیں بہت  نیچ حرکت ہے۔بلاول  آخری بندہ ہے جس نے عمران خان پر کرپشن کا الزام لگایا  ہے۔

شبلی فراز نے کہا کہ  خان صاحب کو نہ کسی نے مسٹر 10 پرسنٹ کہا اور نہ ہی بہن سے  متعلق کبھی کسی نے بات کی۔ہم بلاول بھٹو کے الزامات کی شدید مذمت کرتے ہیں۔

ان کا مزید کہنا تھا کہ بلاول بھٹو  یاتو سو کر اٹھے تھے یا پھر وہ زمینی حقائق سے لاعلم ہیں۔ان کے معاونین  نے بھی انہیں نہیں سمجھایا۔ایسی باتیں کرکے بلاول بھٹو نے اپنا مذاق بنا لیا ہے۔

وفاقی وزیر اطلاعات نے کہا کہ  بلاول بھٹو نے ماضی کی ایک بڑی پارٹی کو لاڑکانہ تک محدود کردیا ہے۔وہ سیاسی طور پر  مایوسی کا شکار ہیں۔ ان کے پاس سیاسی طور پر کوئی ایجنڈا نہیں اس لیے وہ ایسی باتیں کر رہے ہیں۔

شبلی فراز نے مزید کہا کہ  عمران خان پر کرپشن کا الزام لگانے سے پہلے بلاول بھٹوزرداری کو 10 بار سوچنا چاہیے تھا۔وہ اوٹ پٹانگ باتوں کے بجائے اپنے  اور خاندان پر اٹھائے گئے سوالات کا جواب دیں۔