سندھ کے 8 لاکھ میٹرک، انٹرمیڈیٹ کے طلباء کو بغیر امتحانات کے پروموٹ کرنے کا معاملے پر سندھ تعلیمی بورڈز کے سربراہان کا اجلاس طلب کر لیا گیا ہے۔

تفصیلات کے مطابق سندھ اسمبلی نے تعلیمی بورڈز کے قانون میں ترمیم کر دی گئی ہے اور اس سے متعلق سندھ کے تعلیمی بورڈز امتحانی نتائج کے سافٹ ویئر کو اپڈیٹ کرنے سے متعلق اجلاس میں غور کریں گے۔

ذرائع کا کہنا ہے کہ موجودہ امتحانی نتائج کو تیار کرنے والے سافٹ ویئر کو اپڈیٹ کیا جائے گا، نویں اور گیارہویں جماعت کے مطابق دسویں اور بارہویں جماعت میں گزشتہ حاصل کر دہ نمبر کے ساتھ اضافی 3 فیصد دینے کے لیے سافٹ ویئر میں ترمیم کی جائے گی۔

سندھ اسمبلی میں انٹرمیڈیٹ اور سیکنڈری ایجوکیشن کا ترمیمی بل منظور

ذرائع کا مزید کہنا ہے کہ 2 پرچوں میں فیل طلباء کو اوسطاً نمبر دینے کے لیے بھی امتحانی نتائج کے سافٹ ویئر میں ترمیم کی جائے گی۔

اس حوالے سے سیکریٹری بورڈ اینڈ یونیورسٹیز ریاض الدین قریشی نےکہا ہے کہ ماہ اگست میں امتحانی نتائج کو تیار کرنے کا عمل مکمل ہو جائے گا۔

تعلیمی بورڈز کا ترمیم بل صوبائی کابینہ اور اسمبلی نے منظور کر لیا ہے جس کے مطابق تعلیمی بورڈز کو اختیار ہے کہ طلباء کو بغیر کسی امتحان کے پروموٹ کر سکتا ہے اور طلباء کو بغیر کسی امتحان کے پروموٹ وباء یا عالمی وباء کی صورت میں ایمرجنسی نافذ پر کیا جا سکتا ہے جبکہ طلباء کا پروموشن حکومت کی جانب سے جاری کر دہ پالیسی کے تحت ہوگا۔