معاون خصوصی برائے سیاسی روابط  ڈاکٹر شہباز گل نےکہا ہے کہ ذاتی مفادات کیلئے ملکی سلامتی سے کھیلنا زرداری خاندان کیلئے نیا کام نہیں۔

تفصیلات کے مطابق معاون خصوصی برائے سیاسی روابط ڈاکٹر شہباز گل نے بلاول زرداری کے بیان پر ردعمل دیتے ہوئے کہا کہ ملکی مفاد سے زیادہ اپنا لوٹا مال بچانے کی سیاست آپ کو وراثت میں ملی ہے۔

ڈاکٹر شہباز گل نے کہا کہ موجودہ اسمبلی میں اپوزیشن کو سب سے زیادہ بولنے کا موقع دیا گیا، کاش کہ پرچی چئیرمین کو جمہوری اقدار کا پتہ ہوتا۔

معاون خصوصی برائے سیاسی روابط نے مزید کہا کہ تحریک عدم اعتماد لانے کا شوق بھی پورا کرلیں، کل تک مولانا کیساتھ مل کر حکومت کو گھر بھیجنے والا اج جمہوریت کا لیکچر دے رہا ہے۔

ڈاکٹر شہباز گل کا کہنا تھا کہ جمہوریت کے نعرے کو زرداری اور شریف خاندان نے تجوریاں بھرنے کیلئے استعمال کیا جبکہ دوسروں کو زمہ داریاں بتانے والے پرچی چئیرمین کبھی اپنی زمہ داریوں پر بھی غور کریں۔

اسپیکر قومی اسمبلی نے جانبدارانہ کردار ادا کیا ہے، بلاول بھٹو

معاون خصوصی برائے سیاسی روابط ڈاکٹر شہبازگل کا مزید کہنا تھا کہ بلاول زرداری کو سکھایا گیا ہے کہ کرپشن کرنا اور بچانا ہی اپکی ذمہ داری ہے۔

واضح رہے اس سے قبل پریس کانفرنس کرتے ہوئے بلاول بھٹو کا کہنا تھا کہ اسپیکر کی ذمہ داری ہے کہ وہ تمام پارٹیوں کو بات کرنے کا موقع دیں لیکن لگتا ہے اسپیکر کو پی ٹی آئی کی طرف سے حکم ملا ہوا تھا۔ ان کے خلاف تحریک عدم اعتماد آنی چاہیے۔

بلاول بھٹو نے پریس کانفرنس میں کہا تھا کہ اسپیکر یاد رکھیں وہ پی ٹی آئی کے کارکن نہیں ہیں بلکہ ہاؤس کے کسٹوڈین ہیں لیکن وہ اپنا کردار فراموش کرچکے ہیں۔

انہوں نے مزید کہا ہے کہ حکومت نے جو آج کیا سمجھ سے بالاتر ہے کیونکہ حکومت نے ذاتی انا کی وجہ سے غیرمتنازع بل کو متنازع بنادیا ہے۔