چیئرمین سینیٹ محمد صادق سنجرانی نے کہا ہے کہ پاکستان ترکی کے ساتھ تعلقات کو انتہائی اہمیت دیتا ہے جبکہ پاکستان خطے اور علاقائی سطح پر امن کا خواہاں ہے۔

تفصیلات کے مطابق چیئرمین سینیٹ محمد صادق سنجرانی اور ترکی کی گرینڈ نیشنل اسمبلی کے اسپیکر مصطفی سینتوپ کا ٹیفونک رابطہ ہوا ، جس میں علاقائی ترقی و خوشحالی کے لئے کوششیں مزید تیز کرنے پر اتفاق کیا گیا۔

ٹیلیفو نک رابطے کے دوران اہم امور ، دوطرفہ تعلقات اور علاقائی صورتحال پر تبادلہ خیال بھی ہوا جبکہ دونوں رہنماؤں نے ایک دوسرے کو عید کی مبارکباد بھی دی۔

چیئرمین سینیٹ نے کہا کہ موجودہ حالات میں پارلیمانوں پر بھاری ذمہ داری آگئی ہے ،کورونا وائرس نے نئے چیلنجز پیدا کر دیئے ہیں۔

محمد صادق سنجرانی نے یہ بھی کہا کہ کورونا وائرس کے باعث عالمی سطح پر رابطہ کاری اور معاونت کو مزید فروغ دینے کی ضرورت ہے۔

چیئرمین سینیٹ کا کہنا تھا کہ امن ، ترقی، اقتصادی خوشحالی ہمارا مشترکہ ایجنڈا ہےجبکہ خطے میں ترقی اور خوشحالی کے لئے کوشاں ہیں،تنازعات کا ڈائلاگ اور پرامن حل ترقی کے عمل کو آگے لے جانے میں مددگار ثابت ہوں گے۔

چیئرمین سینیٹ سے گورنر پنجاب کی ملاقات، باہمی امور پر تبادلہ خیال

محمد صادق سنجرانی کا یہ بھی کہنا تھا کہ بین الاقوامی اور علاقائی سطح پر مثالی تعاون ایک دوسرے پر اعتماد کو ظاہر کرتا ہے ،ترکی نے ہمیشہ پاکستان کے نقطہ نظر کو سراہا ہے اور ساتھ دیا ہے۔

چیئرمین سینیٹ محمد صادق سنجرانی کا مزید کہنا تھا کہ پاکستان ترکی تعلقات ، بین الپارلیمانی تعلقات، عوامی سطح پر روابط کو مزید فروغ دینگے۔