دریائے چناب میں چنیوٹ کے مقام پر پانی کی سطح انتہائی  بلند ہوگئی ہے جس کے باعث سیلاب کا خطرہ پیدا ہوگیا۔

تفصیلات کے مطابق ڈپٹی کمشنر چنیوٹ کا کہنا ہے کہ سیلاب کے خطرے کے پیش نظرمتعلقہ اداروں کو حفاظتی انتظامات مکمل کرنے کی ہدایت کر دی گئی ہے اور تمام اداروں کو الرٹ کردیا گیا ہے۔

ڈپٹی کمشنر نےقریبی آبادیوں میں رہنے والے افراد کو محفوظ مقامات پر منتقل  ہونے کی ہدایت جاری کی گئی ہے۔

اس سلسلے میں دریائے چناب پر فلڈ ریلیف کیمپ بھی قائم کر دیا گیا ہے جس کا ڈپٹی کمشنر اور ڈی پی او نے دورہ کیا۔ ڈپٹی کمشنر چنیوٹ کو ممکنہ سیلاب کے پیش نظر انتظامات پر بریفنگ بھی دی گئی۔

فلڈ کنٹرول روم کے مطابق ہیڈ تریموں کے مقام پانی کی آمد 57 ہزار 988 کیوسک ہے اور پانی کا اخراج 43 ہزار 538 کیوسک ہے جبکہ اس وقت دریائے چناب کے مقام پر پانی کا بہاؤ 35000 کیوسک ہے۔

سندھ اور بلوچستان میں بارشوں نے تباہی مچا دی،خضدار میں سیلاب سے سی پیک روٹ متاثر ہوا، سڑکیں زیر آب آنے سے ٹک، کرخ، کنجڑ اور مولہ کا زمینی رابطہ منقطع ہو گیا تھا۔

اسی طرح قلات میں سیلابی ریلہ آنے سے ہربوئی ٹو گزگ اور جوہان ٹو گزگ سڑک کئی مقامات سے بہہ گئی، جس سے متعدد دیہات کا رابطہ منقطع ہو گیا۔

بولان کے پہاڑی علاقوں میں شدید بارش کے باعث گوکرد کے مقام پر پل گر گیا اور پنجرہ پل کے قریب سیلابی پانی سے  سڑک بہہ گئی ہے۔

باغبانہ ڈیم بھرنے سے سیکڑوں ایکڑ پر کھڑی فصلیں زیر آب آ گئیں، درجنوں مکانات بھی تباہ ہوگئے۔