سابق وزیراعظم نوازشریف کی تازہ ترین میڈیکل رپورٹ منظر عام پر آ گئی۔

تفصیلات کے مطابق نواز شریف کی رپورٹ ڈاکٹر ڈیوڈ لارنس اور ڈاکٹر فیاض شوال کی جانب سے تیارکی گئی، امریکی ماہر امراض قلب نے انھیں علاج کے بغیر واپسی سے منع کر دیا۔

 رپورٹ میں ڈاکٹر ڈیوڈ لارنس کی طرف سے بتایا گیا ہے کہ نوازشریف کی صحت کو شدید خطرات کے پیش نظر انہیں سفر کرنے سے منع کیا ہے، نوازشریف کو رش والی جگہوں پر جانے سے منع کیا ہے کیونکہ ان کے لیے ایئرپورٹ، جہاز کے سفر یا رش والے مقام پرجانا خطرناک ثابت ہوسکتا ہے ۔

ڈاکٹر ڈیوڈ لارنس نے لکھا ہے کہ نواز شریف کاعلاج لندن میں ہونا بہتر ہے کیونکہ لندن میں ڈاکٹرز ان کی میڈیکل ہسٹری سے آگاہ ہیں، انھیں کسی عام مریض کی نسبت زیادہ توجہ کی ضرورت ہے۔

میڈیکل رپورٹ میں نواز شریف کے ذاتی معالج ڈاکٹر فیاض شوال نے لکھا ہے کہ نواز شریف کی صحت کو سخت خطرات لاحق ہیں کیونکہ وہ پہلے سے ہی ذہنی دباوَ کا شکار ہیں۔

انھوں نے بتا یا کہ مسلم لیگ ن کے قائد اب بھی انجائنا کے مرض میں مبتلا ہیں، ان کی جلد انجیو گرافی کی جائے گی کیونکہ پاکستان جانے سے پہلے ان کی انجیو گرافی ہونا انتہائی ضروری ہے۔

سابق وزیراعظم کی رپورٹ میں مزید لکھا ہے کہ انجیو گرافی میں تاخیر عالمی وبا کی وجہ سے ہوئی جبکہ کورونا وائرس کے دوران نواز شریف کو کسی بھی قسم کے سفر سے منع کیا ہے۔

واضح رہےکہ نواز شریف کی تازہ ترین رپورٹ پر 8 ستمبر کی تاریخ درج ہے۔