آئی جی پنجاب انعام غنی نےموٹروے زیادتی کیس میں فی الحال کسی ملزم کی گرفتاری کی تردید کردی ہے ۔

تفصیلات کےمطابق پنجاب پولیس کے سربراہ انعام غنی نے کیس میں ملزم کی گرفتاری سے متعلق مختلف ٹی وی چینلز اور سوشل میڈیا پر چلنے والی خبروں کو غلط قرار  دے دیا  ہے  ۔

آئی جی پنجاب کا کہنا ہے کہ سوشل میڈیا پر ملزمان اور خاتون کی شیئر کی جانے والی تصاویربھی جعلی ہیں، کیس میں اب تک کوئی ملزم گرفتار نہیں ہوا ہے۔

انعام غنی کا کہنا تھا کہ کیس کی تفتیش کو خود مانیٹر کر رہا ہوں،کسی کامیابی پر میڈیا کو خود آگاہ کریں گے۔

آئی جی  پنجاب  نے مزید کہا کہ ایسی غیر تصدیق شدہ خبریں کیس پر اثرانداز ہوتی ہیں اور عوام کے لیے بھی گمراہ کن ہیں، میری میڈیا کے نمائندوں سے گزارش ہے کہ وہ تصدیق کے بغیر کوئی خبر نہ چلائیں جبکہ  عوام سے بھی گزارش ہے کہ ہم پر اعتماد رکھیں۔

آئی جی پنجاب نے کہا کہ ہم جلد ملزمان کو گرفتار کرکے قانون کے کٹہرے میں کھڑا کر دیں گے۔

  واضح رہے کہ  9 ستمبر کو لاہور کے علاقے گجر پورہ میں موٹر وے پر خاتون کو اجتماعی زیادتی کا نشانہ بنانے کا واقعہ پیش آیا تھا۔

میڈیا رپورٹس کے مطابق دو افراد نے موٹر وے پر کھڑی گاڑی کا شیشہ توڑ کر خاتون اور اس کے بچوں کو نکالا، موٹر وے کے گرد لگی جالی کاٹ کر سب کو قریبی جھاڑیوں میں لے گئے اور پھر خاتون کو بچوں کے سامنے زیادتی کا نشانہ بنایا۔