وزیراعظم عمران خان نے کہا ہے کہ گذشتہ 2 سال کے عرصے میں ہماری حکومت نے ملک کو مشکل اقتصادی صورتحال سے باہر نکالا ہے۔

تفصیلات کے مطابق وزیراعظم عمران خان کی جانب سے ایک نجی ٹی وی چینل کو انٹرویو دیا گیا ہے۔

انٹرویو میں وزیراعظم عمران خان کی جانب سے گذشتہ دو سال کے دوران  ملک  کو درپیش  چیلنجز اور ان سے نبردآزما ہونے کے لیے  حکومتی اقدامات پر تفصیلی اظہار خیال کیا گیا ہے۔

وزیراعظم نے کہا کہ ہم نے معیشت کو صحیح راستے پر گامزن کیا  اور ملک کو مشکل اقتصادی صورتحال سے باہر نکالا ہے۔

وزیراعظم نے کہا ہے کہ لاہور سیالکوٹ موٹر وے پر ہونے والے افسوسناک واقعے نے پوری قوم کو ہلا کر رکھ دیا ہے اور اس طرح کے واقعات میں ملوث افراد کو سخت سزائیں ملنی چاہیں ۔

انہوں نے کہا ہے کہ اسطرح کی حرکات کرنے والوں کو سرعام پھانسی دی جانی چاہئے لیکن اس ضمن میں ہم پر بین الاقوامی سطح پر دباؤ ہے کیونکہ پاکستان کے ساتھ تجارت کے لئے یورپی یونین کی یورپی یونین کی جی ایس پی کی حیثیت عوامی پھانسیوں سے متاثر ہوگی۔

وزیراعظم عمران خان نے کہا ہے کہ حکومت کی مربوط پالیسی کے نتیجے میں ہم کورونا وبا پر قابو پانے میں کامیاب ہوئے ہیں ۔ نجی ٹی وی چینل کو انٹرویو میں وزیراعظم نے کہا کہ کورونا کی روک تھام کے لیے ہم نے سوچ سمجھ کر فیصلے کئے۔

یہی وجہ ہے کہ آج پوری دنیا ہماری پالیسی کا اعتراف کر رہی ہے۔