امیر جماعت اسلامی پاکستان سینیٹرسراج الحق کا کہنا ہے پی ٹی آئی کی حکومت میں آنے کے بعد کرپشن میں اضافہ ہوا ہے، پہلے افراد کرپشن کرتے تھے اب حکمران کرپشن کررہے ہیں۔

سینیٹرسراج الحق کا ادارہ نور حق میں اہم پریس کانفرنس سے خطاب کرتے ہوئے کہا کہ آج پیپلز پارٹی کی طرف سے آل پارٹیز کانفرنس میں تحفظات کی بناء پر شرکت نہیں کی، جماعت اسلامی صاف و شفاف اور اچھی حکمرانی پر یقین رکھتی ہے۔

 سراج  الحق کا کہنا تھا کہ  پی ٹی آئی کی حکومت آئی نہیں بلکہ لائی گئی ہے، مختلف مافیاوں کو اکٹھا کرکے موجودہ حکومت بنائی گئی، ملک کی معیشت 1952 کے بعد آج تباہ ہوئی ہے، نیب عدلیہ کے متبادل ادارہ  بن چکا  ہے۔

امیر جماعت اسلامی کا کہنا تھاکہ   عمران خان نے کہا تھا کہ خودکشی کرلوں گا لیکن آئی ایم ایف سے قرضہ نہیں لوں گا، آج اشیائے خوردونوش اور بجلی کی قیمتوں میں ڈبل اضافی ہوا ہے، پی ٹی آئی کی حکومت ایسی حکومت ہے جو صرف کاغذوں میں موجود ہیں۔

 کراچی کے حوالے سے کہنا تھا کہ کراچی پاکستان کا معاشی و نظریاتی شہ رگ ہے، کراچی میں بجلی اور گیس کا شدید بحران ہے، صدر ، گورنر سمیت کئی وفاقی منسٹر کراچی سے تعلق رکھتے ہیں اس کے باوجود کراچی کے مسائل حل نہیں کیے۔

 سراج  الحق نے کہا  کہ  جماعت اسلامی کا کوئی ذاتی ایجنڈا نہیں ہے، جماعت اسلامی کا ایک ہی ایجنڈا ہے کہ پاکستان میں رہنے والے ایک ہی صف میں ہوں اور سب کے حقوق کو مہیا کیا جائے۔