وزیراعظم عمران خان نے پارٹی رہنماؤں کو جنرل اسمبلی اجلاس کے موقع پر مودی کے خلاف نیویارک میں بھرپور احتجاج کی ہدایت کردی۔

تفصیلات کے مطابق وزیراعظم ہاؤس میں پاکستان تحریک انصاف اوورسیز کے سیکرٹری جنرل ڈاکٹر عبداللہ ریاڑنے وزیر اعظم عمران خان سے ملاقات کی۔

ملاقات میں اقوام متحدہ جنرل اسمبلی کے اجلاس میں شرکت کے لیے تیاریوں پر مشاورت اور کشمیر کی صورتحال پر بیرون ملک پاکستانیوں کے تاثرات پر بات چیت کی گئی ۔

اس موقع پر وزیراعظم نے ہدایت جاری کی کہ تحریک انصاف نیویارک میں مقبوضہ کشمیر میں بھارتی بربریت کے خلاف کمیونٹی اور انسانی حقوق کی تنظیموں کو متحرک کرے اور جنرل اسمبلی کے اجلاس میں شرکت کیلئے نیو یارک آنے والے بھارتی وزیراعظم کے خلاف بھرپور احتجاج کی تیاریاں کرے۔

وزیراعظم عمران خان کا کہنا تھا کہ سفاک مودی سرکار تمام انسانی و بین الاقوامی قوانین و ضوابط روند رہی ہے اور کشمیریوں کو نشانہ ستم بنانے کی تیاریوں میں ہے۔

وزیراعظم کا یہ بھی کہنا تھا کہ سلامتی کونسل کی قراردادوں اور دو طرفہ معاہدوں کی موجودگی میں بھارت سرکار کے پاس کشمیر پر غاصبانہ قبضے کا کوئی جواز موجود نہیں

وزیر اعظم عمران خان کا مزید کہنا تھا کہ بطور سفیر مقبوضہ کشمیر کے عوام کی آواز دنیا کے ہر فورم پر اٹھاؤں گا۔

ڈاکٹرعبد اللہ ریاڑ کی وزیر اعظم سے ملاقات میں وزیراعظم کے حالیہ دورہ امریکا کے بعد کی صورت حال پر بھی گفتگو کی گئی۔

واضح رہے کہ اس سے قبل گورنر سندھ عمران اسماعیل نے مقبوضہ کشمیر میں معصوم کشمیریوں پربھارت کی طرف سے کلسٹر بم کے استعمال پر رد عمل دیتے ہو ئے کہا تھا کہ کشمیر کے مسئلہ کا حل اقوام متحدہ کی قرار دادوں کے عین مطابق ہی ممکن ہے، صورتحال واضح ہے کہ وزیراعظم عمران خان کے کامیاب دورہ امریکا کا غصہ بھارت کشمیریوں پر نکال رہا ہے۔