احتساب عدالت کی جانب سے ایل این جی ریفرنس میں غیر حاضر ملزمان کے وارنٹ جاری کرنے کا عندیہ دے دیا گیا۔

تفصیلات کے مطابق احتساب عدالت راولپنڈی میں ایل این جی ریفرنس کی سماعت ہوئی، اس دوران کیس کے ضمنی ریفرنس میں نامزد عبداللہ خاقان عباسی بھی عدالت میں پیش ہوئے جبکہ دو 2 غیر ملکی ملزمان آج بھی پیش نہیں ہوئے جس پر انہیں دوبارہ طلبی کےسمن جاری کیے گئے۔

نیب حکام نےعدالت کو بتایا گیا کہ غیر ملکی ملزمان کی کمپنیوں کے نام نوٹس بھیجے گئے تھے، لیکن معاملے پر ابھی تک دفتر خارجہ سے کوئی جواب موصول نہیں ہوا۔

عدالت نے اس موقع پر اپنے ریمارکس دیتے ہوئے کہا کہ جب تک غیر ملکی کمپنیوں کو سمن کی تعمیلی رپورٹ نہیں آتی فرد جرم عائد نہیں ہو گی۔

بعد ازاں عدالت نے نیب سے غیر ملکی ملزمان کو سمن کی تعمیلی رپورٹ آئندہ سماعت پر طلب کر لی۔

نیب نے غیر ملکی ملزمان سے متعلق رپورٹ کے لیے 3 ہفتے کی مہلت مانگی، شاہد خاقان عباسی کے وکیل بیرسٹر ظفر اللہ نے کہا کہ غیر ملکی ملزمان سے متعلق وقت زیادہ لگ سکتا ہے، ہماری استدعا ہے کہ آئندہ تاریخ کے لیے زیادہ وقت دیا جائے۔

احتساب عدالت نے ریمارکس دیے کہ زیادہ لمبی تاریخ نہیں رکھ سکتے، شاید آئندہ سماعت پر غیر حاضر ملزمان کے وارنٹ جاری کرنا پڑیں گے۔

عدالت نے نیب کو ضمنی ریفرنس میں نامزد ملزمان کو آج ہی ریفرنس کی نقول فراہم کرنے حکم دے دیا۔

بعد ازاں ایل این جی ریفرنس پر سماعت 20 اکتوبر تک ملتوی کردی گئی۔