کراچی میں بجلی کی لوڈشیڈنگ کا دورانیہ 14 گھنٹے سے بھی بڑھ گیا۔

تفصیلات کے مطابق لوڈشیڈنگ میں اضافے کے باعث شہریوں کو شدید اذیت  کا سامنا کرنا پڑ رہا ہے۔شہر کےمختلف علاقوں میں بدترین بجلی کی لوڈ شیڈنگ کا سلسلہ جاری ہے۔

 کورنگی، بلدیہ ٹاؤن اور اورنگی ٹاؤن میں 5 گھنٹے سے زائد بجلی کی لوڈشیڈنگ جاری ہے جبکہ لوڈشیڈنگ سے مستثنیٰ علاقوں میں بھی بجلی معطلی کا دورانیہ 5 گھنٹے سے بڑھ گیا ہے۔

گزشتہ رات شہر کے کئی علاقوں میں بجلی غائب رہی اور مختلف علاقوں میں 12 سے 14 گھنٹے تک کی لوڈشیڈنگ ہوئی۔

 نیو کراچی اور نارتھ ناظم آباد میں بجلی کی آنکھ مچولی جاری رہی جبکہ سرجانی ٹاؤن کے مختلف سیکٹرز، کورنگی دو نمبر، ڈیڑھ نمبر، بھٹائی آباد، پہلوان گوٹھ اور رابعہ سٹی میں بھی کئی گھنٹے سے بجلی معطل ہے۔

کراچی کے علاقے شاہ فیصل کالونی، ملیر اور لانڈھی میں بھی بجلی کی طویل لوڈشیڈنگ کا سلسلہ جاری ہے۔

ترجمان کے الیکٹرک کے مطابق گیس سپلائی میں کمی کے باعث صنعتی علاقوں میں لوڈ شیڈنگ بڑھنے کا خدشہ ہے۔ کم گیس پریشر کے باعث بجلی کی پیداواری صلاحیت متاثر ہو رہی ہے۔

ترجمان کے الیکٹرک کے مطابق مجموعی طور پر 400 میگاواٹ بجلی کی فراہمی متاثر ہے۔ سائٹ اور کورنگی سمیت گیس پر چلنے والے پاور پلانٹس سے بجلی کی پیداوار متاثر ہوئی ہے۔