وزیراعظم عمران خان نے کہا ہے کہ کاروبار میں آسانیاں پیدا کرنا، غیر ضروری ریگولیشنز کا خاتمہ ترجیح ہے۔

تثصییلات کے مطابق وزیراعظم عمران خان کی ملک کے معروف صنعت کاروں اور کراچی کی کاروباری تنظیموں کے نمائندگان  کے وفد سے ملاقات ہوئی ہے۔

اس موقع پر وفد نے کاروباری برادری کو درپیش مشکلات سے بھی وزیرِ اعظم کو آگاہ کیا جبکہ حکومتی ٹیم نے کاروبار میں آسانیاں فراہم کرنے اور کاروباری عمل کو آسان بنانے کے حوالے سے اٹھائے جانے والے اقدامات سے آگاہ کیا۔

اس موقع پر وفد ممبران نےکراچی پیکیج، ملک میں صنعتی عمل،  چھوٹی اور درمیانی درجے کی صنعتوں کے فرو غ کے حوالے سے حکومتی پالیسی اور اقدامات کو سراہا۔

ملاقات میں وزیراعظم نے کہا کہ ٹیکس کے نظام میں بہتری اور صنعتی عمل سے وابستہ کاروباری برادری کے لئے ہر ممکنہ سہولت فراہم کرنا حکومت کی اولین ترجیح ہے۔

 وزیراعظم عمران خان نے مزید کہا کہ کاروباری برادری کی تجاویز کو مدنظر رکھتے ہوئے اصلاحاتی و سہولت کاری کے عمل کو مزید آگے بڑھایا جائے گا جبکہ کاروباری برادری سے ملاقاتوں کا سلسلہ جاری رہے گا۔

وفد میں میاں انجم نثار، شارق وہرا، سلیم الزماں، فیصل معیض، محمد علی، عبدالہادی ، نوید شکور، انجینئر نثار ، اجمل افضل اور زبیر باویجہ ، گورنر سندھ عمران اسمعیل، وفاقی وزیر اسد عمر، مشیر تجارت عبدالرزاق داؤد، مشیر خزانہ ڈاکٹر عبدالحفیظ شیخ ، مشیر ڈاکٹر عشرت حسین، چیئرمین سرمایہ کاری بورڈ ، چیئرمین ایف بی آر و دیگر سینئر افسران شریک ہوئے۔