معاون خصوصی برائے صحت ڈاکٹر فیصل سلطان نے کہا ہے کہ مہلک وائرس دوبارہ پھیل رہا ہے اور لوگوں نے ایس او پیزپرعمل در آمد کرنا چھوڑ دیا ہے۔

تفصیلات کے مطابق معاون خصوصی برائے صحت ڈاکٹر فیصل سلطان کی میڈیا سے گفتگو کرتے ہوئے کہنا تھا کہ دنیا میں کورونا کے پھیلاو کو روکنے کیلئے پاکستان کی کامیابی کی معترف ہے لیکن لوگوں نے ایس او پیزپرعمل در آمد کرنا چھوڑ دیا ہے جس کے باعث خدشہ ہے کہ ہماری جیتی ہوئی کامیابی اس وجہ سے چھن نہ جائے۔

ڈاکٹرفیصل سلطان نے خدشہ ظاہر کرتے ہوئے کہا ہے کہ کورونا کی وبائی صورتحال میں  3 ہفتے پہلےحالات  معمول پر تھے لیکن اب اموات بڑھ رہی ہیں، احتیاطی تدابیر پر عمل نہ ہونے کی صورت میں ایک بار پھر سے لاک ڈاؤن اور مختلف انڈسٹریوں کو بند کرنا پڑ سکتا ہے۔

انہوں نے کہا ہے کہ عوام ماسک کا استعمال کریں، شادی ہالز، عوامی اجتماعات میں احتیاط کریں۔

ان کا مزید کہنا تھا کہ اس میں کوئی شک نہیں کہ اگر اعداوشمار بڑھے تو ہم پابندیاں دوبارہ لگا سکتے ہیں۔

قبل ازیں نیشنل کمانڈ اینڈ آپریشن سنٹر (این سی او سی)  کے اجلاس کے دوران ملک بھر میں بڑھتے کورونا کیسز اور اموات پر تشویش کا اظہار کیا گیا اور کہا گیا کہ کورونا ایس او پیز کی خلاف ورزی اسی طرح جاری رہی تو مختلف شعبے بند بھی کیے جاسکتے ہیں۔

ذرائع کے مطابق اجلاس میں تمام صوبوں کے چیف سیکریٹریز کو کورونا ایس او پیز پر سختی سے عمل درآمد کی ہدایت کی گئی۔

این سی او سی کے اجلاس میں کہا گیا کہ ہائی رسک سیکٹرز ٹرانسپورٹ، مارکیٹس ،شادی ہالز، ریسٹورنٹس اور عوامی اجتماعات پر خصوصی توجہ دی جائے اور ایس او پیز کی خلاف ورزی پر سخت کارروائی کی جائے۔

اس کے ساتھ ساتھ اجلاس کے دوران کہا گیا کہ ماسک کے استعمال اور سماجی فاصلے کویقینی بنایا جائے۔