مقبوضہ جموں و کشمیر میں بھارتی تسلط کو 73 برس مکمل ہوگئے ہیں، دنیا بھر میں کشمیری آج یوم سیاہ منا رہے ہیں اس موقع پر مقبوضہ وادی میں حریت قیادت نے ہڑتال کی کال دی ہے۔

 ستائیس اکتوبر انیس سو سینتالیس کو بھارت نے اپنی فوجیں کشمیر میں اتارکرغیر قانونی قبضہ کرلیا جوابھی تک قائم ہے۔یہ  دن مقبوضہ کشمیر کیلئے دنیا کی تاریخ کا سیاہ ترین دن ہے۔

 73 برس قبل اس تاریخ کو ہندوستان نے تمام عالمی قوانین کو پامال کرتے ہوئے نہ صرف کشمیر پر غاصبانہ قبضہ کیا بلکہ ظلم و بربریت کی ایک نئی داستان رقم کی۔

 تقسیم ہند کے وقت ریاستوں کو اختیار دیا گیا کہ وہ استوابِ رائے سے اپنے مستقبل کا فیصلہ کریں۔ اس اختیار کے تحت کشمیریوں کی مقامی قیادت نے پاکستان کے ساتھ کشمیر کے الحاق کا فیصلہ کیا۔

مہاراجہ ہری سنگھ نے ہندو ہونے کی وجہ سے دباؤ میں آکر ساز باز کرکے ہندوستان کے ساتھ ایک جعلی معاہدہ کیا جس کی قانونی و تاریخی حیثیت ثابت شدہ نہیں۔

بھاگتے ہندو مہاراجہ کی کشمیری عوام کی اُمنگوں کے برعکس معاہدے کی کوئی قانونی اور اخلاقی حیثیت نہیں۔

جونا گڑھ کی ریاست نے اپنا الحاق پاکستان کے ساتھ کیا مگر انڈیا نے مکاری سے اس پر بھی قبضہ کر لیا جس کا نواب آف جونا گڑھ آج بھی دعویٰ کرتے ہیں۔

آر ایس ایس کے غنڈوں اور پٹیالہ رجمنٹ کے ذریعے بے گناہ کشمیریوں کے خون سے ہولی کھیلی گئی۔ 

بھارت اب تک ایک لاکھ سے زائد کشمیریوں کا قتلِ عام کر چکا ہے۔  22ہزار920عورتوں کو بیوہ، ایک لاکھ 7ہزار 802سے زائد بچوں کو یتیم جبکہ 11ہزار219عورتوں کی آبرور یزی کی گئی۔