عالمی وباء کے پیش نظر سندھ بھر میں حکومت کی جانب سے مزید سخت احکامات جاری ہونے کے امکانات ظاہر کردیئے گئے ہیں ۔

ذرائع کے مطابق کورونا وائرس کے بڑھتےکیسز کے باعث سندھ حکومت نے مزید سختی کرنے کا فیصلہ کیا ہے۔

اس ضمن میں سندھ حکومت کی جانب سے آج حکم نامہ جاری ہونے کے واضح امکانات ظاہر کئے گئے ہیں جس کے مطابق جہاں احتیاطی تدابیر اختیار نہیں کی جارہی وہاں مزید سختی ہوگی اور جہاں پر احتیاطی تدابیر پر عمل نہیں ہوگا ان کے خلاف ایکشن ہوگا۔

یاد رہے کہ اس سے قبل کراچی انتظامیہ نے کورونا پھیلنے کے خدشات کے پیش نظر شہریوں پر ماسک پہننا لازمی قرار دے دیا ہے، کمشنر و ایڈ منسٹریٹر کراچی افتخار شالوانی نے احکامات جاری کر دئیے۔

کمشنر و ایڈ منسٹریٹر کراچی افتخار شالوانی نے تمام ڈپٹی کمشنرز کو ہدایت کی ہے کہ وہ شہریوں کو لازمی ماسک پہننے کی ہدایت کریں کہ شہری لازمی ماسک پہنیں۔

کمشنروایڈ منسٹریٹر کراچی نے کہا کہ جو شہری اس ماسک پہننے کی ہدایت کی خلاف ورزی کریں ان کے خلاف کارروائی کریں اور پانچ سو روپے تک جرمانہ عائد کریں۔

افتخار شالوانی نے یہ بھی کہا کہ دکانداروں اور مارکیٹوں پر کورونا ایس او پیز پر عملدرآمد کو یقینی بنائیں دکانداروں کو پابند کریں کہ وہ خود اور خریداروں سے ماسک کے بغیر دکان میں داخل ہونے کی اجاز ت نہ دیں۔

کمشنر و ایڈ منسٹریٹر کراچی افتخار شالوانی نے ڈپٹی کمشنرز کو ہدایت کی کہ وہ ان دکانداروں اور مارکیٹ انتظامیہ کے خلا ف قانونی کارروائی کریں جو کورونا ایس او پیز پر عملدرآمد سے گریز کریں۔