پاکستان مسلم لیگ ن آج مانسہرہ میں جلسہ کرے گی ، جس کی تیاریاں مکمل کر لی گئی ہیں۔

تفصیلات کے مطابق مسلم لیگ ن کی نائب صدراور سابق وزیراعظم نواز شریف کی صاحبزادی  مریم نواز جلسے سے خطاب کریں گی۔

ذرائع کے مطابق جلسے سے مسلم لیگی رہنما شاہد خاقان عباسی، انجینئر امیر مقام اور مرتضی ٰجاوید عباسی بھی خطاب کریں گے۔

 واضح رہے کہ گزشتہ روز مانسہرہ کی ضلعی انتظامیہ نے ملک بھر میں کورونا وائرس کی دوسری لہر کے باعث مسلم لیگ ن کو جلسے کی اجازت دینے سے انکار کر دیا تھا۔

خیبر پختونخوا حکومت نے کورونا وائرس کے خطرات کے پیش نظر گزشتہ روز ہی جلسے جلوسوں پر پابندی عائد کر دی تھی۔

ضلعی انتظامیہ مانسہرہ کا کہنا ہے کہ مانسہرہ میں جلسے سے کورونا وائرس پھیلنے کا خدشہ ہے، ضلع میں کورونا مثبت کیسز کی تعداد 9 فیصد ہے،عوامی اجتماع سے وائرس پھیل سکتا ہے،این او سی نہ ملنے پر پولیس نے جلسہ کی سیکیورٹی دینے سے معذرت کر لی۔

مانسہرہ میں مریم بی بی کے جلسے کی تیاریاں جاری ہیں۔۔ انشااللہ شیرنی کل پھر ڈھاڑے گی۔۔۔#MaryamNawazInMansehra pic.twitter.com/Ibwtidr9mz

— Hina Parvez Butt (@hinaparvezbutt) November 17, 2020

کورونا کے وار، گزشتہ 24 گھنٹوں کی صورتحال

گزشتہ چوبیس  گھنٹوں کے دوران کورونا وائرس سے متا ثرہ مزید 37 افراد جاں بحق ہو گئے۔

 نیشنل کمانڈ اینڈ آپریشن سینٹرکے جاری کردہ اعداوشمار کے مطابق  ملک میں 24 گھنٹوں کے دوران پاکستان میں کورونا وائرس کے 2 ہزار 208 نئے کیسز رپورٹ ہوئے ہیں اور متاثرہ افراد کی مجموعی تعداد 3 لاکھ 63 ہزار 380 ہوگئی ہے۔

 گزشتہ 24 گھنٹے کے دوران کورونا سے 37 اموات ہوئیں جس کے بعد کورونا سے اموات کی مجموعی تعداد 7 ہزار 230 تک پہنچ چکی ہے۔

نیشنل کمانڈ اینڈ آپریشن سینٹر کے مطابق پاکستان میں کورونا وائرس کے 3 لاکھ 25 ہزار 788 مریض صحتیاب ہو چکے ہیں۔

 اسلام آباد میں کورونا کیسز کی تعداد 24 ہزار 871 ہو چکی ہیں جبکہ مزید 3 افراد کی موت کے بعد اموات کی مجموعی تعداد 263 تک پہنچ گئی۔

اسلام آباد میں کورونا کے 3 ہزار900 مریض زیر علاج ہیں۔

خیبر پختونخوا میں کورونا مریضوں کی تعداد 42 ہزار 815  ہے اور ایک ہزار 318 افراد جان کی بازی ہار چکے ہیں۔

سندھ میں ایک لاکھ 57 ہزار 432 کورونا کیسز ہو چکے ہیں جبکہ سندھ میں مزید 9 افراد کی موت کے بعد اموات کی مجموعی تعداد 2 ہزار 760 تک پہنچ چکی ہے۔

 پنجاب میں ایک لاکھ 11 ہزار626 کورونا کیسز ہیں اور مزید 17 افراد کی موت کے بعد اموات کی مجموعی تعداد 2 ہزار 509 تک پہنچ گئی ہے۔

 بلوچستان میں 16 ہزار 529 افراد متاثر اور اموات کی مجموعی تعداد 156 ہے۔

گلگت بلتستان میں کورونا کے 4 ہزار467 کیسز اور 93 اموات رپورٹ ہو چکی ہیں۔

یاد رہے کہ عالمی وبا کورونا وائرس کی پہلی لہر کو پاکستان میں بہترین حکمت عملی سے قابو کیا گیا تھا، اب دوسری لہر شروع ہو چکی ہے، جسے قابو کرنے کے لیے مختلف اقدامات کیے جا رہے ہیں۔

صوبائی حکومتوں کو ہدایت کی گئی ہے کہ  بازاروں، شاپنگ مالز، پبلک ٹرانسپورٹ، ریسٹورنٹس میں ایس او پیز اور ماسک کو لازم قرار دیں۔

شہری گھروں سے باہر نکلتے وقت ماسک لازمی پہنیں۔ حکومتی اور نجی سیکٹرز کے دفاتر میں کام کرنے والوں کے لیے ماسک پہننا لازم ہوگا۔