پنجاب کابینہ نے شہبازشریف اورحمزہ شہبازکی پیرول پررہائی کی منظوری دے دی۔

تفصیلات کے مطابق پاکستان مسلم لیگ ن کے صدر شہباز شریف اور ان کے صاحبزادے حمزہ شہباز کو پیرول پررہائی کی منظوری5روزکیلئے دی گئی ہے۔

ذرائع کے مطابق محکمہ داخلہ پنجاب کی جانب سے سمری وزیر اعلی کو بھجوا گئی تاہم حتمی منظوری صوبائی کابینہ نے دی۔

ذرائع کے مطابق شہباز شریف اور حمزہ شہباز کو پانچ روز کے لئے پیرول پر رہا کیا جائے گا۔

واضح رہے کہ صوبائی وزیر فیاض الحسن چوہان کا کہنا تھا کہ شریف برادران کی والدہ کی میت پاکستان آنے کی تاریخ معلوم ہونے پر حکومت پیرول پر رہائی کا فیصلہ کرے گی۔

 وزیر جیل خانہ جات پنجاب فیاض الحسن چوہان نے ویڈیو پیغام میں کہا کہ کلثوم نواز کی وفات پر نواز شریف کو 12 دن کے لیے پیرول پر رہائی ملی تھی،ڈپٹی کمشنر صرف بارہ گھنٹے کے لیے پیرول پر رہا کرسکتا ہے، بارہ گھنٹے سے زائد رہائی کا فیصلہ صوبائی حکومت کرے گی۔

انہوں نے مزید کہا کہ حکومت شہبازشریف اور حمزہ شہباز کو مکمل طورپر سہولت فراہم کرے گی کہ وہ بیگم شمیم اختر کی نماز جنازہ اور دیگر رسومات میں مکمل طورپر شریک ہو سکیں۔

واضح رہےکہ دوسری جانب لا ہور میں پریس کانفرنس کرتے ہوئے پاکستان مسلم لیگ ن کی ترجمان مریم اورنگزیب نے کہا کہ حکومت ہر معاملے میں ناکام ہوئی، ملکی معیشت کا جنازہ نکل چکا، سٹیٹ بنک کی رپورٹ کے مطابق تباہی کا سفر جاری ہے، یہ رپورٹ حکومت کے خلاف فرد جرم ہے، جی ڈی پی گروتھ 5.8فیصد سے 1.9فیصد پر آگئی، یہی حکومت رہی تو معیشت کا مزید برا حال ہو گا۔

 ذرائع کا کہنا ہےکہ شہباز شریف کو پیرول پر کل رہا کئے جانے کاامکان ہے۔

پارٹی ذرائع کے مطابق شہبازشریف رہائی کے بعد اپنی والدہ کی تدفین اور جنازہ کے مقام کا دورہ کریں گےجس کے بعد حتمی فیصلہ کریں گےکہ والدہ کی نماز جنازہ رہائش گاہ کے اندر یا شریف میڈیکل سٹی میں پڑھائی جائے ۔

پارٹی ذرائع کا مزید کہنا ہے کہ شریف فیملی نے جاتی امراء میں رہائش کا انتظام کر دیا ہے