وفاقی وزیر اطلاعات سنیٹر شبلی فراز نے کہا ہے کہ فلمی صنعت کی ترقی و بحالی پاکستان تحریک انصاف حکومت کی ترجیح ہے۔

تفصیلات کے مطابق وفاقی وزیر اطلاعات سنیٹر شبلی فراز سے پاکستان فلم پروڈیوسرز ایسوسی ایشن کے وفد کی ملاقات ہوئی جس میں وفد نے وزیر اطلاعات کو فلمی صنعت کو درپیش مسائل سے تفصیلی طور پر آگاہ کیا۔

اس موقع پر پی ایف پی اے نے کہا کہ فلم سازی کو بہتر بنانا چاہتے ہیں اس ضمن میں حکومت کا تعاون درکار ہے۔

سنیٹر شبلی فراز نے ملاقات میں کہا کہ فلمی صنعت کے فروغ کے لئے ساز گار ماحول کی فراہمی کے لئے پرعزم ہیں۔

وفاقی وزیر اطلاعات نے یہ بھی کہا کہ جو ادارے خود کو جدید تقاضوں سے ہم آہنگ نہیں کرتے وہ اہمیت کھو دیتے ہیں جبکہ دیگر اداروں کی طرح اس شعبے کو بھی نئے دور کے تقاضوں سے ہم آہنگ ہونا ہو گا۔

سنیٹر شبلی فراز کا کہنا تھا کہ وزارت اطلاعات کے شعبہ فلم کو مزید فعال اور موثر بنا رہے ہیں جبکہ وزیراعظم عمران خان کا ویژن ہے کہ فلموں کے ذریعہ اپنی ثقافت اور اقدار کو اجاگر کیا جائے۔

وفاقی وزیر اطلاعات کا یہ بھی کہنا تھا کہ فلمیں صرف تفریج نہیں بلکہ معاشرتی اصلاح اور تربیت کا باعث بنتی ہیں، ہمیں فلموں کے ذریعے اپنے قومی ورثے اور ثقافت کے تحفظ کے ساتھ ساتھ دنیا بھر میں پاکستان کا مثبت تشخص روشناس کرانا ہے ور اس ضمن میں حکومت فلمی صنعت کو ہر ممکن سہولیات دینے کے لئے تیار ہے۔

سنیٹر شبلی فراز نے کہا کہ آئندہ نسلوں کواپنی تاریخ اور مشاہیر سے متعارف کرانا ہے، فلمسازی کے مراحل میں شامل سکرپٹ رائٹرز‘ موسیقاروں سمیت تمام ہنر مندوں کو انکے کام کا مناسب معاوضہ ملنا چاہیے۔

وفاقی وزیر اطلاعات سنیٹر شبلی فراز نے مزید کہا کہ فلمی صنعت سے وابستہ مسائل کے حل کے لئے تمام ممکنہ اقدامات اٹھائیں گے جبکہ ایران اور ترکی کے ساتھ فلم کے شعبے میں تعاون پر بات کرینگے۔

ملاقات میں چیئرمین پاکستان فلم پروڈیوسر ایسوسی ایشن میاں امجد فرزندکی سربراہی میں ملاقات کرنے والے وفد میں چوہدری اعجاز کامران،عالیہ رشید، راؤ شہزاد،رانا نعیم ، ایڈیشنل سیکرٹری اطلاعات شاہیرہ شاہد اور وزارت کے دیگر حکام بھی شامل تھے۔