پشاور: خیبر پختونخوا حکومت نے ایک بار پھر اسمبلی اجلاس کے بغیر ہی بجٹ منظوری پر غور شروع کردیا۔
ذرائع کے مطابق خیبرپختونخوا حکومت کے بجٹ اور اسمبلی اجلاس بلانے کے معاملات پر صوبائی حکومت اسمبلی اجلاس بلانے سے انکاری نظر آرہی ہے۔
ذرائع کا کہنا ہے کہ خیبر پختونخوا حکومت نے ایک بار پھر اسمبلی اجلاس کے بغیر ہی بجٹ منظوری پر غور شروع کردیا جب کہ صوبائی حکومت آئندہ دو ماہ کے بجٹ کی منظوری دے گی۔
ذرائع نے بتایا کہ بجٹ کی منظوری صوبائی کابینہ کے اجلاس میں دیے جانے کی توقع ہے، آئندہ 2 ماہ کے لیے 360 سے 400 ارب روپے تک بجٹ تیار کرلیا گیا ہے۔
ذرائع کا کہنا تھا کہ بجٹ صرف جاری اخراجات کی مد میں جاری کیا جائے گا اور محکموں کو صرف تنخواہوں اور جاری اخراجات کے لیے فنڈز دیے جائیں گے۔
ذرائع نے یہ بھی بتایا کہ محکمہ خزانہ جاری اخراجات کے علاوہ ترقیاتی بجٹ جاری کرنے سے گریزاں ہے تاہم ترقیاتی بجٹ منظور نہ ہونے سے محکموں کو مشکلات کا سامنا ہے اور ترقیاتی بجٹ نہ ہونے سے صوبہ بھر میں متعدد منصوبے رک گئے ہیں۔
ذرائع کا مزید کہنا تھا کہ صوبائی اسمبلی اجلاس نہ بلانے سے ترقیاتی و دیگر معاملات ٹھپ ہوگئے ہیں، گزشتہ تین چار ماہ سے صرف اخراجات جاری کرنے کی منظوری دی جانے لگی ہے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News