وزیراعظم عمران خان کا کہنا ہے کہ  حکومت پاک بحریہ کو ہر طرح کا تعاون فراہم کرتی رہے گی۔

تفصیلات کے مطابق  وزیراعظم عمران خان  نے نیول ہیڈ کوارٹرز اسلام آباد کا دورہ کیا ۔

نیول ہیڈ کوارٹرز آمد پر پاک بحریہ کے سربراہ ایڈمرل محمد امجد خان نیازی نے وزیراعظم کا استقبال کیا۔  پاک بحریہ کے چاق و چوبند دستے نے وزیراعظم کو گارڈ آف آنر پیش کیا۔

وزیراعظم عمران خان نے نیول ہیڈ کوارٹرز میں یادگار شہداء پر پھول چڑھائے اور  ان کا پرنسپل اسٹاف آفیسرز سے تعارف کرایا گیا۔

وزیر اعظم کو علاقائی میری ٹائم سیکیورٹی کی صورتحال، چیلنجز اور میری ٹائم سیکٹر کی ترقی  کے لیے پاک بحریہ کے اقدامات پر تفصیلی بریفنگ دی گئی۔

وزیراعظم نے ملکی بحری سرحدوں کے دفاع، گوادر بندرگاہ سمیت سی پیک کو سیکیورٹی کی فراہمی اور علاقائی امن  کے لیے پاک بحریہ کی کاوشوں کو سراہتے ہوئے کہاکہ  حکومت پاک بحریہ کو ہر طرح کا تعاون فراہم کرتی رہے گی۔

عمران خان نے کہا کہ  حکومت معاشی ترقی میں میری ٹائم سیکٹر کی افادیت کے پیش نظر اس کے فروغ  کے لیے کوشاں ہے۔  حکومت کی جانب سے 2020 کو بلیو اکانومی کا سال قرار دیا جانا بحری معیشت کی ترقی  کے لیے حکومتی اقدامات کا مظہر ہے۔

امیرالبحر نے پاک بحریہ کی صلاحیتوں پر اعتماد کے اظہار پر وزیراعظم کا شکریہ ادا کرتے ہوئے کہا کہ پاک بحریہ اللہ تعالٰی کی مدد سے ملکی سمندری سرحدوں اور بحری مفادات کے تحفظ  کے لیے ہمہ وقت تیار ہے۔

 وفاقی وزراء پرویز خٹک، ڈاکٹر عبدالحفیظ شیخ، سید علی حیدر زیدی،  معاون خصوصی ڈاکٹر معید یوسف اور سینئر افسران بھی وزیر اعظم کے ہمراہ تھے۔