وزیر اعظم عمران خان کا کہنا ہے کہ میرا مشن پاکستان سمیت ساری دنیا میں مسلمانوں کومتحد کرنا ہے۔

کوئٹہ میں سانحہ مچھ کے شہداء ہزارہ برادری کے   لواحقین سے ملاقات کے بعد اظہار خیال کرتے ہوئے وزیر اعظم عمران خان نے کہا کہ   ہم نےشہدا کےلواحقین سےجووعدےکیے ہیں وہ پورےکریں گے ۔

عمران خان نے کہا کہ   ہزارہ کمیونٹی کے ساتھ بڑے سانحے پیش آئے ہیں،   میں ہزارہ برادری کےپاس پہلےبھی آچکا ہوں۔ جب دہشتگردی زیادہ تھی اور لوگ آنے سے گھبراتے تھے میں اس وقت بھی آیاہوں۔

انہوں نے کہا کہ 35  سے 40 لوگ دہشت  گردی کررہے ہیں،دشمن پورےملک میں انتشارپھیلاناچاہتےہیں۔ ہم متاثرین کواکیلا نہیں چھوڑیں گے۔سیکیورٹی فورسزکا ایک سیل بن رہا ہے،ہزارہ کمیونٹی کوتحفظ فراہم کیا جائے گا۔

وزیر اعظم نے کہا کہ   وزیرداخلہ کواس لیےبھیجاکہ شہدا ءکےلواحقین کواعتماددیں ۔

عمران خان کا کہنا تھا کہ  ہماری انٹیلی جنس ایجنسیوں نے آگاہ کیا کہ بھارت پاکستان میں فرقہ ورانہ انتشارپھیلانا چاہتا ہے۔ ایجنسیوں نے دہشت گردوں کی تین سے چارکارروائیاں ناکام بنائی ہیں۔

انہوں نے مزید کہا کہ ہمیں پتا ہے کہ شیعہ سنی فساد پھیلانے کی کوشش کون کررہا ہے۔ فتنہ پھیلانے والوں کے پیچھے جائیں گے،قوم کواکٹھا کریں گے۔

وزیر اعظم نے کہا کہ دنیا میں مسلمانوں میں تقسیم پیداکی جارہی ہے۔  میرا مشن پاکستان سمیت ساری دنیا میں مسلمانوں کومتحد کرنا ہے۔

عمران خان نے کہا کہ  میں نے ایران اورسعودی عرب کے تعلقات کوبہتربنانے کی بڑی کوشش کی ہے۔

وزیر اعظم نے کہا کہ  جب  میں نے ایک فرقہ پرست تنظیم کا نام لےکرتنقید کی تھی تومجھے دھمکیاں دی گئی تھیں۔