وزیراعظم عمران خان ایک روزہ کراچی کے دورے میں صفائی کی صورت حال کا جائزہ لینے کے ساتھ شہر کے مسائل پر بریفنگ بھی لیں گے۔

تفصیلات کے مطابق وزیراعظم عمران خان ایک روزہ دورے پر 14ستمبر کو کراچی آئیں گے جبکہ کراچی کے مسائل حل کرنے کے لئے عمران خان کی قائم کردہ کمیٹی کا پہلا اجلاس آج ہوگا۔

اجلاس میں کراچی کے مسائل کے حل کے لئے تجاویز پیش کی جائیں گی،اجلاس وفاقی وزیرفروغ نسیم کے دفترمیں ہوگا۔

وزیراعظم عمران خان  کراچی دورے کے دوران ارکان قومی اورصوبائی اسمبلی سے بھی ملاقاتیں کریں گے۔

یاد رہےگزشتہ روز کراچی کے حوالے سےعمران خان کی زیرصدارت کراچی کے مسائل سے متعلق اجلاس ہوا تھا۔

اجلاس میں وزیراعظم کو کلین کراچی مہم میں اب تک کی پیشرفت پر بریفنگ دی گئی جبکہ صاف پانی کی فراہمی، سیوریج، صفائی اور ماس ٹرانزٹ سسٹم و دیگرامور پر بھی تبادلہ خیال ہوا تھا۔

اجلاس میں وزیراعظم کا کہنا تھا کہ ماضی کی بدانتظامی اورغفلت کا خمیازہ کراچی کےعوام کو بھگتنا پڑ رہا ہے، یہاں صحت کے معاملے میں شدید خطرات لاحق ہیں۔

اجلاس میں پینے کے صاف پانی کی فراہمی، سیوریج، صفائی، ماس ٹرانزٹ سسٹم و دیگر اہم  مسائل پر تفصیلی گفتگو ہوئی تھی۔

وزیراعظم نے کراچی کے عوام کو درپیش مسائل پر تشویش ظاہر کرتے ہوئے کہا تھا کہ صاف پانی کی قلت اور صفائی کا ناقص انتظام بڑے مسائل ہیں، کراچی کے عوام کو درپیش مسائل پر شدید تشویش ہے، چاہتے ہیں شہر کے مسائل حل ہوں اور عوام کو بہتر سہولتیں میسرآئیں۔

وزیراعظم عمران خان نے کراچی  کے حوالے سےشارٹ، میڈیم اور لانگ ٹرم لائحہ عمل کی تشکیل  کے لیے  کمیٹی بھی تشکیل دی۔