مسلم لیگی رہنما شہباز شریف اور حمزہ شہباز کے جوڈیشل ریمانڈ میں مزید توسیع کر دی گئی ہے۔

تفصیلات کے مطابق منی لانڈرنگ کیس میں شہباز شریف اور حمزہ شہباز لاہور کی احتساب عدالت میں پیش ہوئے، عدالت نے نیب کے گواہان کوبیانات قلمبند کرانے کیلئے طلب کرتے ہوئے سماعت2 فروری تک ملتوی کر دی۔

شہباز شریف اور حمزہ شہباز نے عدالت میں حاضری مکمل کروائی۔

واضح رہےکہ فاضل جج نے شہباز شریف سے استفسار کیا کہ آپ کچھ کہنا چاہتے ہیں، جس پر لیگی رہنما نے کہا ایک خط دینا چاہتا ہوں۔

شہباز شریف نے چین کے سفیر کا خط عدالت میں پیش کر دیا اور کہا کہ مجھے آج ہی یہ خط ملا ہے، چین کے سفیر نے میرے نام خط لکھا اور میرے سی پیک منصوبوں کی تعریف کی، ایک قیدی کو چین کا سفیر خط لکھ رہا ہے جو کسی اعزاز سے کم نہیں، چین پاکستان کا بہترین دوست ہے، میرے اوپر الزامات کی دو سال سے بوچھاڑ ہو رہی ہے، اس کے باوجود چین کے سفیر میری تعریف کر رہے ہیں۔

عدالت میں شہباز شریف کے چین کے سفیر کا خط پڑھنے پر پراسکیوشن نے اعتراض کر دیا۔

پراسکیوٹر نے کہا کہ خط کا اس کیس سے کوئی لینا دینا نہیں، عدالتی وقت ضائع نہ کیا جائے۔

عدالت نے شہباز شریف سمیت دیگر کے خلاف سماعت 2 فروری تک ملتوی کر دی جبکہ نیب کے گوہواں کو بیانات قلمبند کروانے کے لیے اگلی سماعت پر طلب کر لیا۔