وزیر اعظم  عمران خان  نے تحریک انصاف کے ممبران کو غریب اور کمزور طبقوں کی فلاح و بہبود پر توجہ مرکوز رکھنے کی ہدایت کی ہے۔

تفصیلات کے مطابق  وزیراعظم عمران خان سے ساہیوال ڈویژن سے تعلق رکھنے والے  پارلیمینٹیرینز اور تحریک انصاف کے ممبران کے وفد  نے ملاقات کی۔

وزیر اعلیٰ پنجاب سردار عثمان بزدار اور گورنر پنجاب چوہدری سرور بھی ملاقات میں شریک تھے۔

وفد نے ساہیوال کا دورہ کرنے پر وزیراعظم کا تہہ دل سے شکریہ ادا کیا۔

ملاقات میں سیاسی امور، عوامی فلاح و بہبود، ترقیاتی منصوبوں، خصوصاً صحت ،تعلیم کی سہولیات کی فراہمی  اور زرعی شعبے کی ترقی کے حوالے سے جاری اقدامات اور مستقبل کے منصوبوں پر گفتگو کی گئی۔

پارلیمینٹیرینز نے کہا کہ  وزیراعظم کے اسلامی فلاحی ریاست کے ویژن کی روشنی  میں عوام کی فلاح و بہبود اور ترقی کے  لیے کوشاں ہیں۔ وزیراعظم کی ولولہ انگیز قیادت کی بدولت دنیا میں پاکستان کے وقار میں اضافہ ہوا ہے۔

پارلیمینٹیرینز نے مزید کہا کہ  اقوام متحدہ میں وزیراعظم کی تقریر سے پاکستان کے عوام کے سر فخر سے بلند ہو گئے ہیں۔

پارلیمینٹیرینز نے کسانوں کو ریلیف فراہم کرنے کے حوالے سے وزیراعظم کو تجاویز  بھی پیش کیں اور  ساہیوال ڈویژن میں عوام کو درپیش مسائل کے حل سے آگاہ کیا۔

وزیراعظم کو تجاوزات اور قبضہ مافیا کے خلاف ایکشن  کے حوالے سے بھی آگاہ کیا گیا۔

اس موقع پر وزیر اعظم نے پارلیمینٹیرینز اور پارٹی ممبران کو ہدایت کی کہ  غریب اور کمزور طبقوں کی فلاح و بہبود پر خصوصی توجہ مرکوز رکھیں،غریب اور کمزور طبقوں کےاستحصا ل کو روکا جائے۔

عمران خان نے کہا کہ  ماضی میں پورے صوبے کی ترقی کو نظر انداز کر کے صرف مخصوص علاقوں پر وسائل خرچ کیے گئے ۔

انہوں نے مزید کہا کہ  جب حکومت سنبھالی تو ملک کو تاریخی خسارے کا سامنا تھا۔فوری طور پر معاشی استحکام کے حوالے سے فیصلے کیے جن کے نتائج میں بتدریج بہتری آرہی ہے۔

وزیر اعظم نے کہا کہ  کورونا وباء کے حوالے سے موثر حکمت عملی اپنائی جس کی پوری دنیا معترف ہے۔ احساس پروگرام کے تحت غریب اور مستحق عوام میں بغیر کسی سیاسی وابستگی کے رقوم تقسیم کی گئیں۔

عمران خان نے کہا کہ قبضہ مافیا اور بڑے جرائم پیشہ عناصر کے خلاف فوری ایکشن کرکے ان کو قانون کے شکنجے میں لایا جائے۔

وزیر اعظم  نے گورننس میں بہتری کے حوالے سے سیاسی اسٹیک ہولڈرز اور انتظامیہ کے مابین موثر کوآرڈینیشن کی ہدایت کرتے ہوئے کہا کہ  عوام الناس کو درپیش مسائل کے ترجیحی بنیادوں پر حل کے لیے ہر ماہ کھلی کچہریوں کا انعقاد کریں۔