وزیر خارجہ شاہ محمود قریشی کا کہناہے کہ ہم چیلنجز جانتے ہیں اور پاکستان کے مفادات کے تحفظ کیلئے کام کررہے ہیں۔

تفصیلات کے مطابق وزیر خارجہ شاہ محمود قریشی نے کہا ہے کہ امریکی وزیر خارجہ سے تفصیلی گفتگو ہوئی، افغانستان میں پاکستان کے کردار کے حوالے سے گذارشات پیش کیں، میں نے تحریری طور پر ان کو خط بھی لکھا۔

وزیر خارجہ نے کہا کہ ایران کے ساتھ تعلقات میں ہماری حکومت آنے کے بعد بہتری آئی ہے، اگر تعلقات میں سرد مہری ہوتی تو ایرانی وزیر خارجہ 6 مرتبہ پاکستان نہ آتے، کشمیر پر ایرانی سپریم کونسل کی قرارداد اچھے تعلقات کی بنیاد پر ہے۔

وزیر خارجہ کا مزید کہناتھا کہ چین کے ساتھ تعلقات بہتر ہوئے ہیں اور سی پیک کے دوسرے مرحلے کا آغاز ہوگیا ہے۔

وزیر خارجہ کا مزید کہناتھا کہ ہندوستان کے ساتھ بھی معمول کے تعلقات چاہتے ہیں تاہم وزیر اعظم عمران خان کی مثبت پیش کش کو ہندوستان نے ٹھکرایا، ہندوستان کی خارجہ اور کشمیر پالیسی سے ہندوستان کا بڑا طبقہ مطمئن نہیں ہے۔

وزیر خارجہ نے کہا کہ آج ہندوستان پر جو انگلیاں اٹھ رہی ہیں وہ پاکستان پر اٹھ رہی تھیں، ہندوستان کی پالیسیوں پر عالمی سطح پر تنقید ہورہی ہے۔

انہوں نے کہا کہ خارجہ پالیسی کا معیشت کے ساتھ براہ راست تعلق ہے، ہمیں حکومت ملی تو ملک میں دیوالیہ ملا، 20 ارب ڈالر کا ریسورس گیپ ملا۔

انہوں نے کہا کہ ہم اب معاشی ڈپلومیسی کی طرف جارہے ہیں، ایک سال میں معاشی ڈپلومیسی کی بدولت افریقہ کو برآمدات میں 7 فیصد اضافہ ہوا، رواں ماہ یورپی ممالک کے ساتھ معاشی ڈپلومیسی پر کانفرنس کریں گے۔

وزیر خارجہ نے مزید کہا کہ ہم ہمسایوں کے ساتھ اچھے تعلقات چاہتے ہیں، پی ٹی آئی حکومت آنے سے پہلے افغانستان کے ساتھ تعلقات کیا تھے، ہم نے افغانستان کے ساتھ تعلقات کو بہتر کرنے کی کوشش کی ہے اس میں کامیابی بھی ملی ہے۔

انہوں نے کہا کہ افغانستان کی حکومت خود اعتراف کررہی ہے کہ امن عمل میں پاکستان ان کا مددگار ہے، ہماری حکومت نے شیئرڈ ویژن پر دستخط کئے اور دوطرفہ تجارت پر بات کی۔

سعودی عرب سے تعلقات پر بات کرتے ہوئے وزیر خارجہ نے کہا کہ سعودی عرب کے ساتھ ہمارے اسٹرٹیجک تعلقات ہیں، پاکستانی اگر کسی مٹی کیلئے جان دے سکتا ہے تو وہ مدینہ کی مٹی کیلئے ہے۔

انہوں نے کہا کہ سعودی عرب نے ہمیں کریڈٹ فیسیلٹی دی جس کی مدت مقرر تھی، یو این کی قرارداد جو کہ گستاخانہ خاکوں کے حوالے سے تھی وہ پاکستان اور سعودی عرب نے مل کر جمع کرائی۔

وفاقی وزیر خارجہ کا مزید کہناتھا کہ متحدہ عرب امارات کے ساتھ تعلقات بھی بہتر ہیں، میں یو اے ای کا دورہ کرکے ابھی آیا ہوں، یو اے ای نے یہ باور کرایا کہ پاکستان کے ساتھ تعلقات بہتر ہی رہیں گے۔