وفاقی وزیر اطلاعات شبلی فراز نے کہا ہے کہ پاکستان ہمیشہ کشمیریوں کی سیاسی، سفارتی اور اخلاقی مدد کرتا رہیگا۔

تفصیلات کے مطابق وفاقی وزیر اطلاعات شبلی فراز نے میڈیا سے گفتگو کرتے ہوئے کہا ہے کہ آج کا دن اس بات کی عکاسی کرتا ہے کہ ہم اپنے کشمیری بہن بھائیوں کو نہیں بھولےہیں۔

شبلی فراز نے کہا ہے کہ پاکستان کی کشمیر سے یہ یکجہتی شہیدوں اور آزادی کی نعمت سے محروم لوگوں کی قربانیوں کا اعتراف ہے۔

انہوں نے کہا ہے کہ بھارت کی جانب سے آرٹیکل 370 کو منسوخ کرکے جو اقدام کیا گیا جس کے باعث گزشتہ ڈیڑھ سال سے پورے ایک خطے کو جیل میں تبدیل کر دیا گیا ہے اور اس سے پورا کشمیر سراپا احتجاج ہے۔

ان کا کہنا تھا کہ کشمیر میں خواتین کی عصمت دری اور نوجوانوں کو اغوا کیا جا رہا ہےیہ انسانی حقوق کے علمبرداروں کیلئے سوالیہ نشان ہے۔

وفاقی وزیر کا کہنا تھا کہ وزیر اعظم عمران خان نے موثر طریقے سے عالمی سطح پر کشمیر کی آواز اٹھائی ہے جبکہ اس حکومت نے کشمیر کاز کو عالمی سطح پر لے جانے میں ایک نئی روح پھونکی ہے۔

ان کا کہنا تھا کہ پاکستان کے تمام لوگ کشمیریوں کیساتھ کھڑے ہیں اور ہم کشمیریوں کی سیا سی، سفارتی اور اخلاقی مدد کرتے رہیں گے تاہم عالمی ادارے بھی اپنا کردار ادا کریں اور یو این کی قراردادوں پر عملدرآمد کرائے۔