دنیا کے دوسرے بلند ترین پہاڑ کے ٹو کو سر کرنے کی کوشش کے دوران لاپتہ ہونے والے پاکستان کے عالمی شہرت یافتہ کوہ پیما علی سد پارہ اور ان کی ٹیم کی تلاش کےلئے آج پھر سے سرچ آپریشن شروع کر دیا گیا ہے۔

گزشتہ روز کیے جانے والے فضائی سرچ آپریشن میں بھی موسم سرما میں کے ٹو سر کرنے کی کوشش کے دوران لاپتہ ہونے والے علی سدپارہ اور ان کے ساتھیوں کا پتا نہیں چل سکا تھا۔

پاکستانی کوہ پیما محمد علی سدپارہ، آئس لینڈ کے جان سنوری اور چلی کے جوان پابلو جمعہ کی شام سے لاپتا ہیں۔

لاپتہ پاکستانی کوہِ پیما علی سدپارہ کے صاحبزادے ساجد سدپارہ کا کہنا ہے کہ ایسا لگتا ہے واپسی پروالد کیساتھ کوئی حادثہ ہوا ہے۔

انھوں نے کہا کہ آخری بار والد کو 8200 کی بلندی پر دیکھا تھا، دوپہر12بجے کے قریب میں نیچے آیا تھا۔

ساجد سدپارہ نے بتایا کہ جب میں نیچے آیا تب علی سدپارہ اور ٹیم اوپر چڑھ رہے تھے، جہاں تک مجھے لگتا ہے والد نے کے ٹو سر کر لیا ہے۔

انھوں نے قوم سے اپیل کی ہے کہ ان کے والد محمد علی سدپارہ سمیت ان کی ٹیم کی بحفاظت واپسی کے لیے دعا کریں۔

 وزیراعلی گلگت بلتستان کا کہنا ہے کہ آرمی ایوی ایشن کے تعاون سے سرچ اینڈ ریسکیو آپریشن آج تیسرے روز بھی جاری رہے گا۔

انھوں نے مزید کہاکہ سرچ آپریشن میں آرمی ایوی ایشن کا کردار انتہائی قابل تحسین ہے۔

دوسری جانب وزیراعظم عمران خان اور آرمی چیف جنرل قمر جاوید باجوہ نے کوہ پیماؤں کی باحفاظت واپسی کےلیے تمام وسائل بروئے کار لانے کی ہدایت کی ہے۔

ذرائع کے مطابق وزیر خارجہ شاہ محمود قریشی اور آئس لینڈ کے وزیرخارجہ کے درمیان ٹیلی فونک رابطہ بھی ہوا ہے۔

وزیر خارجہ نے کہا کہ لاپتہ کوہ پیماؤں کی تلاش کیلئے پاکستان ہر ممکن کوشش کرے گا۔