سعودی عرب نے اقوام متحدہ اور عالمی ماہرین کو تیل کی تنصیبات پر ہونے والے حملے کی تحقیقات میں شامل ہونے کی دعوت دی ہے۔

 عرب میڈیا کی رپورٹ کے مطابق سعو دی وزارت خارجہ سے جاری بیان میں کہا گیا کہ ہفتہ 14 ستمبر پٹرولیم تنصیبات پر جودنیا کو تیل کی فراہمی کے لیے اہم ہے، اس پر جارحیت اور سبوتاژ کی کارروائی ناقابل قبول ہے ۔

 اس حملے کے نتیجے میں سعودی آرامکو کی پیداوار کا تقریبا 50 فیصد معطل ہے۔

بیان میں کہا گیا کہ تیل کی تنصیبات پر ہونے والے حملے کی ابتدائی تحقیقات میں یہ اشارہ ملا ہے کہ استعمال کیے جانے والے ہتھیار ایرانی تھے تاہم ابھی یہ پتہ لگانے کے لیے تحقیقات کی جا رہی ہیں کہ حملے کا ذریعہ کون ہے۔سعودی عرب اس جرم کی مذمت کرتاہے ، جس سے بین الاقوامی امن و سلامتی کو خطرات لاحق ہوگئے ۔

بیان میں مزید کہا گیا کہ تحقیقات جاری ہیں۔ سعودی عرب، اقوام متحدہ اور بین الاقوامی ماہرین کو دعوت دیتا ہے کہ وہ زمینی صورتحال کا جائزہ لیں اور تحقیقات میں شامل ہوں۔

مملکت ، نتائج کی بنیاد پر سیکیورٹی اور استحکام یقینی بنانے کے لیے موزوں اقدامات کرے گی۔

 بیان میں کہا گیا کہ عالمی برادری نے اس حملے کی مذمت کی اور اسے مسترد کیا۔ سعودی عرب اس اقدام کی ستائش کرتا ہے۔ عالمی برادری سے اپیل ہے کہ وہ عالمی معیشت کو خطرہ بننے والے اس غیر ذمہ دارانہ رویہ کے خلاف ایک مضبوط اور واضح موقف اختیار کریں۔

بیان میں سعودی عرب کے اس عزم کا اعادہ کیا گیا کہ اپنے عوام اور سرزمین کا دفاع اور جارحیت کا بھرپور جواب دینے کی صلاحیت ہے۔