وزیرِ اعظم عمران خان نے کہا ہے کہ ذاتی چھت ہر غریب اور کم آمدنی والے فرد کا حق ہے۔

تفصیلات کے مطابق وزیرِ اعظم عمران خان کی زیر صدارت نیشنل کوارڈینیشن کمیٹی برائے ہاؤسنگ کنسٹرکشن اینڈ ڈویلپمنٹ کا ہفتہ وار اجلاس ہوا جس میں وفاقی دارالحکومت میں کم آمدنی والے افراد کے لئے شروع کیے جانے والے منصوبوں کے حوالے سے وزیرِ اعظم کو بریفنگ دی گئی۔

بریفنگ دیتے ہوئے کہا گیا کہ ہاؤسنگ اور کنسٹرکشن کے منظور شدہ اور زیر غور منصوبوں  کی کل معاشی سرگرمی کا حجم 2.07 ٹریلین روپے ہے۔

 بریفنگ میں کہا گیا کہ اب تک منظور شدہ منصوبوں کے نتیجے میں 796.5 ارب  روپےکی معاشی سرگرمی پیدا ہو رہی ہے جبکہ زیر غور منصوبوں کی منظوری کے نتیجے میں مزید  1.28 ٹریلین روپے کی معاشی سرگرمی پیدا ہوگی۔

بریفنگ کے دوران یہ بھی کہا گیا کہ ان منصوبوں کے نتیجے میں  ڈھائی لاکھ افراد کو براہ راست جبکہ ساڑھے چار لاکھ افراد کو بالواسطہ نوکریوں کے مواقع میسر آئیں گے، ایل ڈی اے کی جانب سے 11.03 ملین مربع فٹ رقبے پر تعمیرات  کے 3435 منصوبوں کی منظوری دی جا چکی ہے جبکہ 700 منصوبے منظوری کے لئے زیر غور ہیں۔

بریفنگ میں بتایا گیا کہ راولپنڈی ڈویلپمنٹ اتھارٹی کی جانب سے 4.8 ملین مربع فٹ پر تعمیرات کے اب تک 67 منصوبوں کی منظوری دی جا چکی ہے جبکہ 51 منصوبے زیر غور ہیں۔

بریفنگ میں کہا گیا کہ سی ڈی اے کی جانب سے 12.8 ملین مربع فٹ پر تعمیرات کے 121 منصوبوں کی منظوری دی جا چکی ہے جبکہ 18.7 ملین مربع فٹ تعمیرات کے 142 منصوبے منظوری کے لئے زیر غور ہیں

وزیراعظم کو بریفنگ دیتے ہوئے مزید کہا گیا کہ سندھ بلڈنگ کنٹرول اتھارٹی کی جانب سے 9.1 ملین مربع فٹ کے 33 منصوبوں کی منظوری دی جا چکی ہے جبکہ 40.8 ملین مربع فٹ کے 269 منصوبے منظوریوں کے منتظر ہیں۔

 چیف سیکرٹری پنجاب نے بریفنگ دیتے ہوئے کہا کہ اراضی ریکارڈ کی تصدیق کے حوالے سے بنکوں کی سہولت کے   پورٹل قائم کرکے اسے فعال بنایا جا چکا ہے۔

بریفنگ میں یہ بھی کہا گیا کہ پورٹل پر بنک کی جانب سے ریکارڈ کی تصدیق کا عمل پانچ دنوں میں مکمل کرنے کو یقینی بنایا گیا ہے، اگلے مرحلے میں بنکوں کو اراضی ریکارڈ  سے متعلقہ  دستاویز  کی فراہمی کو یقینی بنایا جائے گا۔

چئیرمین سی ڈی اے نے کہا کہ پہلے مرحلے میں پانچ ہزار یونٹس تعمیر کیے جائیں گے جس کا سنگ بنیاد اپریل کے پہلے ہفتے میں رکھا جائے گا۔

وزیرِاعظم عمران خان نے سندھ میں منظوریوں  کے عمل پر تشویش کا اظہار کرتے ہوئے کہا کہ تعمیراتی سرگرمیوں کے فروغ سے پیدا ہونے والی معاشی سرگرمی کا براہ راست فائدہ سندھ کی عوام اور صوبے کو ہوگا

عمران خان نے کہا کہ ذاتی چھت ہر غریب اور کم آمدنی والے فرد کا حق ہے اور حکومت اس حق کی فراہمی میں  ہر طرح سے سہولت پہنچانے کے لئے پر عزم ہے۔

وزیرِ اعظم عمران خان نےت مزید کہا کہ بے گھر افراد کو اپنی چھت حاصل کرنے میں سہولت فراہم کرنا موجودہ حکومت کی اولین ترجیح ہے۔