زرداری ہاؤس اسلام آباد میں ہونے والے عشائیے کی اندرونی کہانی سامنے آگئی۔

تفصیلات کے مطابق عشائیے میں سرکردہ پی پی رہنماؤں، سینیٹرز اور وکلاء نے شرکت کی، اس موقع پرچیئرمین پیپلز پارٹی بلاول بھٹو نے چیئرمین سینیٹ سے متعلق انتخابات پر گفتگو کی۔

بلاول بھٹو کا پی پی پی رہنماؤں سے گفتگو کے دوران کہناتھا کہ یہ غلط تاثر پیدا کیا جارہا ہے کہ کچھ اپوزیشن سینیٹرز نے جان بوجھ کر غلط مہر لگائی، کسی سینیٹر نے غلط مہر نہیں لگائی، مجھے اپوزیشن کے تمام سینیٹرز پرمکمل اعتماد ہے۔

پی پی چیئرمین کا کہناتھا کہ سیکریٹری سینیٹ کی ہدایات کی روشنی میں سینیٹرز کو امیدوار کے خانے میں کہیں بھی مہر لگانے کی ہدایات کی گئی تھی، اپوزیشن کے تمام سینیٹرز نے سید یوسف رضا گیلانی کو ووٹ دیا۔

انہوں نے کہا کہ پاکستان پیپلزپارٹی، مسلم لیگ ن، جمعیت علمائے اسلام (ف) اورعوامی نیشنل پارٹی سمیت اپوزیشن کی تمام جماعتیں پی ڈی ایم کے پلیٹ فارم پر متحد ہیں، کیمروں کی تنصیب کا معاملہ واٹرگیٹ کی طرح ایک بڑا اسکینڈل ہے۔

بلاول بھٹو کا کہنا تھا کہ پریذائیڈنگ آفیسر کا فیصلہ جلد ہائی کورٹ میں چیلنج کریں گے، ہمیں انصاف کی امید ہے، پارلیمان میں سلیکٹڈ عمران خان کے خلاف ہم نے بڑی کامیابیاں سمیٹی ہیں۔

اس موقع پر پی پی رہنماؤں نے بلاول بھٹو سے گفتگو کرتے ہوئے کہا کہ عمران خان کی حکومت اپنا اعتماد کھوچکی ہے، پارلیمان کے ذریعے ہم حکومت کا خاتمہ کرسکتے ہیں۔

 پی پی رہنماؤں کا مزید کہناتھا کہ کامیابیوں کا تسلسل جاری رکھنے کے لئے ضروری ہے کہ اپوزیشن اراکین پارلیمان سے مستعفی نہ ہوں،

بلاول بھٹو نے پی پی رہنماؤں کو جواب دیتے ہوئے کہا کہ پارلیمان سے استعفے دینے یا نہ دینے کا معاملہ اہم ہے، پی ڈی ایم کے پلیٹ فارم سے فیصلے کریں گے۔