الیکشن کمیشن نے کراچی میں قومی اسمبلی کے حلقہ 249 کے کاغذات نامزدگی کی جانچ پڑتال کا عمل مکمل کرلیا ہے۔

تفصیلات کے مطابق این اے 249 کیلئے مجموعی طور پر 55  امیدواروں کی اسکروٹنی کی گئی، جس میں سے 52 امیدواروں کے کاغذات درست قرار جبکہ 3 کے مسترد کردیے گئے۔

 الیکشن کمیشن نے پاکستان تحریک انصاف کے امجد آفریدی، جنید لاکھانی، اشرف قریشی اور ملک شہزاد اعوان سمیت 13 امیدواروں  کے کاغذات درست قرار دیے ہیں جبکہ پی ٹی آئی کے مسرور سیال کے کاغذات مسترد کردیے گئے۔

الیکشن کمیشن کی جانب سے پاکستان مسلم لیگ (ن) کے مفتاح اسماعیل سمیت تین امیدواروں کے کاغذات منظور کرلیے گئے۔

اس کے علاوہ ایم کیو ایم پاکستان کے حافظ مرسلین اور سلمان مجاہد سمیت سات امیدواروں کے کاغذات بھی درست قرار دیے گئے ہیں۔

الیکشن کمیشن نے پیپلز پارٹی کے قادر خان مندو خیل سمیت دو امیدواروں کے کاغذات منظور کیے ہیں جبکہ پی پی امیدوار وحید شاہ کے کاغذات مسترد ہوگئے۔

این اے 249 کیلئے پی ایس پی کے سربراہ مصطفیٰ کمال سمیت تین امیدواروں کے کاغذات درست قرار دیے گئے ہیں۔

اس کے علاوہ مجلس وحدت مسلمین کے مبشر حسن کے کاغذات بھی منظور کرلئے گئے، تحریک لبیک کے چاروں امیدوارمفتی عابد مبارک، محمد اسماعیل رضوی، محمد ساجد، مفتی نذیر کمالوی کے کاغذات منظور کیے گئے ہیں۔

الیکشن کمیشن نے 10 آزاد امیدواروں کے کاغذات درست قرار دیے ہیں جبکہ ایک آزاد امیدوار زنیرا رحمان  کے کاغذات مسترد کردیے۔

خیال رہے کہ قومی اسمبلی کے حلقہ 249 کی نشست فیصل واوڈا کے استعفے کے بعد خالی ہوئی ہے۔