وزیرِ اعظم عمران خان نے کہا ہے کہ گلگت بلتستان کی ترقی موجودہ حکومت کی ترجیحات میں شامل ہے۔

تفصیلات کے مطابق وزیرِ اعظم عمران خان کی زیر صدارت گلگت بلتستان   کی ترقی کے حوالے سے اعلیٰ سطحی اجلاس ہوا جس میں وزیرِ اعظم نے گلگت بلتستان کی ترقی کے لئے ڈویلپمنٹ پیکیج کی منظوری دے دی۔

اجلاس کی صدارت کرتے ہوئے وزیرِ اعظم عمران خان نے کہا کہ گلگت بلتستان میں سیاحت کا بے شمار پوٹینشل موجود ہے جسے برؤےکار لانے کی ضرورت ہے۔

وزیرِ اعظم کا کہنا تھا کہ گلگت بلتستان کی ترقی موجودہ حکومت کی ترجیحات میں شامل ہے، مختلف شعبوں میں ترقیاتی منصوبوں  کی بدولت خطے میں تعمیر و ترقی کا نیا باب روشن ہوگا۔

عمران خان کا یہ بھی کہنا تھا کہ علاقے کے مسائل کا  موثر حل  اور  نوجوانوں کو نوکریوں کے  بے شمار مواقع میسر آئیں گے۔

وزیرِ اعظم عمران خان نے وزیرِ اعلیٰ گلگت بلتستان کو ہدایت دیتے ہوئے کہا کہ سیاحت کے فروغ اور ماحولیاتی تحفظ پر خصوصی توجہ دی جائے۔

اجلاس میں وزیرِ منصوبہ بندی اسد عمر، وزیرِ خزانہ محمد حماد اظہر، وزیرِ مواصلات مراد سعید، وزیر برائے انفارمیشن ٹیکنالوجی امین الحق ، وزیرِ اعلیٰ گلگت بلتستان خالد خورشید، ڈپٹی چئیرمین پلاننگ کمیشن و دیگر سینئر افسران شریک ہوئے۔