وفاقی وزیر برائے سائنس اینڈ ٹیکنالوجی فواد چوہدری نے کہا ہے کہ اب یہ مسئلہ نہیں رہا ہے کہ چاند دیکھا جاسکتا ہے یا نہیں، اب شرعی مسئلہ یہ ہوگا کہ چاند پر موجود لوگ کیسے عید منائیں گے۔

تفصیلات کے مطابق پاکستان کی پہلی ابزرویٹری کے سنگ بنیاد کی تقریب سے خطاب کرتے ہوئے وفاقی وزیر فواد چوہدری نے کہا ہے کہ شروع سے انسان کی توجہ سورج چاند اور ستاروں پر رہی ہے اور مسلمان سائنسدانوں کے دل کے قریب فلکیات رہا ہے۔

فواد چوہدری نے کہا کہ مسلمان سائنسدانوں نے شعبہ فلکیات میں گراں قدر خدمات سرانجام دیں جبکہ نماز، روزے اور عیدوں کا تعلق بھی فلکیات کے شعبے سے جڑا ہوا ہے۔

وفاقی وزیر نے کہاہے کہ یہ ایک تاریخی موقع ہے کہ ہم اسلام آباد میں ابزرویٹری بنا رہے ہیں، اس کے بعد گوادر، کراچی اور پشاور میں ابزرویٹری بنائیں گے۔

انہوں نے کہا ہے کہ اگلے دس پندرہ سالوں میں چاند پر پرائیویٹ ٹورز شروع ہو سکتے ہیں ۔

دوسری جانب چیئرمین رویت ہلال کمیٹی مولانا عبدالخبیر آزاد نے کہا ہے کہ ابزرویٹری سے مرکزی رویت ہلال کمیٹی کو بڑی مدد ملے گی۔

انہوں نے کہا کہ ہماری کوشش ہے پورے ملک میں ایک ہی دن روزہ اور عید ہو اور انشاء اللہ اس دفعہ پورا ملک ایک ہی دن روزہ رکھے گا اور ہم سب عید بھی ایک ہی دن کریں گے۔