وفاقی وزیر فواد چوہدری کا کہنا ہے کہ دو ہفتوں میں کورونا کنٹرول نہ ہوا تو صورتحا ل خراب ہوجائیگی۔

کابینہ اجلاس پر میڈیا کو بریفنگ دیتے ہوئے فواد چوہدری کا کہنا تھا کہ کابینہ کی سمریز اور قانونی مواد کو ڈیجیٹلائز کردیا گیا ہے جبکہ کابینہ سمریز پر سالانہ 51 کروڑ روپے خرچ ہوتے تھے اس کی بچت ہوگی۔

انہوں نے کہا کہ سندھ اور بلوچستان میں کورونا وائرس بڑھ رہا ہے، اجلاس میں اسدعمر نے کورونا صورتحال پر بریفنگ دی، کورونا کی تیسری لہر پہلی لہر سے زیادہ خطرناک ہے، کورونا ویکسین کی درآمد سے متعلق کمیٹی تشکیل دی گئی ہے۔

فواد چوہدری کا مزید کہنا تھا کہ ایس او پیز پر عمل درآمد نہ ہوا تو کورونا وائرس تیزی سے پھیل سکتا ہے، 2 ہفتوں میں کورونا کنٹرول نہ ہوا تو صورتحا ل خراب ہوجائیگی۔

انہوں نے کہا کہ 2 ہفتوں میں کورونا صورتحال نیچے نہ لاسکے تو معاملہ خراب ہوجائے گا۔

فواد چوہدری نے کہا کہ 1992اور 1994 سے پاکستان نے پورٹ چارجز نہیں بڑھائے جبکہ پورٹ چارجز کو مزید کم کرنے کی ضرورت ہے۔