مسلم لیگ ن کے رہنما احسن اقبال کا کہنا ہےکہ ملک میں امن و امان کی صورتحال ایسی ہے کہ سوشل میڈیا بند کرنا پڑا۔

تفصیلات کے مطابق لاہور میں میڈیا سے گفتگو کرتے ہوئے مسلم لیگ ن کے رہنما احسن اقبال نے کہا کہ ملک میں امن و امان کی صورتحال ایسی ہے کہ سوشل میڈیا بند کرنا پڑا، ایسے میں حکومت کی ترجیح جاتی امرا میں شریف خاندان کے گھر مسمار کرنا ہے۔

انہوں نے کہاکہ عمران خان وزارت عظمیٰ کیلئے فٹ نہیں، پاکستان معاشی تباہی کے دہانے پر ہے، احتساب کا ڈرامہ بے نقاب ہوچکا ، مجرمانہ ذہنیت کے تحت یہ شریف فیملی کے گھر کو گرانا چاہتے ہیں۔

احسن اقبال نے کہاکہ وزیراعظم کے نفسیاتی معائنے کی ضرورت ہے ، وہ اس عہدے کے لیے ان فٹ ہیں، ہم مطالبہ کرتے ہیں کہ ماہرین نفسیات کا پینل تشکیل دیا جائے جو سلیکٹڈ وزیراعظم عمران خان کا نفسیاتی معائنہ کرے کیونکہ ان کی انا، حسد اور نفسیاتی کیفیت ملک کو تباہ کررہی ہے۔

مسلم لیگی رہنما نے کہاکہ بجٹ بنانے میں ایک ماہ رہ گیا ہے، پاکستان معاشی تباہی کے دہانے پر ہے، اشیائے خوردونوش کی قیمتیں آسمان کو چھو رہی ہیں، 22 کروڑ عوام حکومت کے ہاتھوں پس رہے ہیں۔

ان کا مزید کہنا تھا کہ چیلنجز سے نمٹنے کیلئے قومی اتحاد کی ضرورت ہے، ان کے پاس کوئی ٹیم ہے نہ کوئی پروگرام، امن و امان کی صورتحال یہ ہے کہ سوشل میڈیا بند کرنا پڑ رہا ہے، ان کو یہ نہیں پتا افغانستان سے امریکی فوج کے انخلا کے کیا اثرات ہوں گے۔