وزیراعظم عمران خان نے وفاقی کابینہ کا اجلاس 20 اپریل کو طلب کرلیا ہے۔

تفصیلات کے مطابق وفاقی کابینہ 13 نکاتی ایجنڈا پر غور کرے گی۔

وفاقی کابینہ کرتارپور راہداری منصوبے کو پیپرا رولز سے استثنی دینے کی منظوری دے گی جبکہ اشیائے خوردونوش کی طلب و رسد کا ریکارڈ رکھنے کے لئے ڈیٹا بیس کے قیام کی بھی منظوری دے گی۔

اقوام متحدہ کی آرمرڈ گاڑیوں کو کراچی سے کابل لے جانے کی اجازت کی سمری کابینہ ایجنڈا میں شامل کر دی ہے۔

معاون خصوصی برائے توانائی گردشی قرضے کے خاتمے کا پلان کابینہ اجلاس میں پیش کریں گے اور ڈاکٹر عشرت حسین پی آئی اے کی ری اسٹرکچرنگ پر کابینہ کو بریفنگ دیں گے۔

کابینہ فیڈرل میڈیکل ٹیچنگ آرڈیننس کے تحت بورڈ آف گورنرز کی تعیناتی کی منظوری دے گی  جبکہ وفاقی کابینہ اسٹریٹیجک ایکسپورٹ کنٹرول ڈویژن کے اختیارات منتقل کرنے کی سمری پر غور کرے گی۔

وفاقی کابینہ جوائنٹ انوسٹمنٹ کمپنیز کے بورڈ آف ڈائریکٹرز کی تعیناتی کی منظوری دے گی اور کابینہ نیشنل انشورنس کمپنی کے چیف ایگزیکٹو کی تعیناتی کی منظوری بھی دے گی۔

نوشہرہ میں ریلوے کی زمین پر کثیرالمنزلہ عمارت کی تعمیر کا معاملہ ایک بار پھر کابینہ ایجنڈا میں شامل کر دیا ہے۔

کابینہ کمیٹی برائے ادارہ جاتی اصلاحات، اسٹیٹ اون انٹرپرائزز کے اجلاسوں کے فیصلوں کی توثیق متوقع ہے۔

وفاقی کابینہ اقتصادی رابطہ کمیٹی کے 7 اپریل کے اجلاس کے فیصلوں کی توثیق کرے گی۔