وزارت توانائی کے قیام سے لے کر اب تک حماد اظہر پہلے وفاقی وزیر توانائی بن گئے ہیں۔

ذرائع کے مطابق لیگی حکومت کے آخری سال اگست 2017 میں وزارت توانائی بنائی گئی تھی۔

ذرائع کا کہنا ہے کہ وزارت توانائی کے ڈویژنز کے وزیر تو بنتے رہے مگر لیگی حکومت میں کسی کو وفاقی وزیر توانائی کا قلمدان نہیں ملا تھا ،موجودہ حکومت میں بھی اس سے قبل کسی کو وفاقی وزیر توانائی نہیں بنایا گیا۔

لیگی حکومت میں اویس لغاری کو پاور ڈویژن کا قلمدان دیا گیا جبکہ شاہد خاقان عباسی نے وزیر اعظم ہوتے ہوئے بھی پیٹرولیم ڈویژن کا قلمدان اپنے پاس رکھا۔

موجودہ حکومت میں عمر ایوب کو پہلے پاور ڈویژن کا قلمدان دیا گیا اور غلام سرور خان کو پیٹرولیم ڈویژن کا وفاقی وزیر بنایا گیا جبکہ بعد میں عمر ایوب کو پیٹرولیم ڈویژن کا اضافی قلمدان بھی دیا گیا تھا۔

ذرائع کا کہنا ہے کہ لیگی حکومت نے دو مختلف وزارتوں کو ملا کر وزارت توانائی بنائی تھی اور وزارت پانی و بجلی سے پاور کو وزارت توانائی کے تحت کردیا گیا تھا۔

وزارت پیٹرولیم و قدرتی وسائل کو ختم کرکے وزارت توانائی کے تحت کیا گیا جبکہ وزارت پانی وبجلی سے پانی کو الگ کرکے وزارت آبی وسائل بنائی گئی تھی۔

ذرائع  کے مطابق وزارت توانائی کے تحت پاور اور پیٹرولیم کے دو الگ الگ ڈویژن بنائے گئے تھے۔