امیر جماعت اسلامی سراج الحق نے کہا ہے کہ تحفظ ناموس رسالت پر کسی قسم کی آنچ نہیں آنے دیں گے۔

تفصیلات کے مطابق امیر جماعت اسلامی سراج الحق نے تحریک لبیک پاکستان کے مرکز جامعہ مسجد رحمت اللعالمین کا دورہ کیا جہاں انھوں نے ٹی ایل پی کی مرکزی قیادت سے ملاقات کی ہے۔

ملاقات میں یتیم خانہ چوک پر پولیس تصادم کے نتیجہ میں زخمی افراد کی عیادت کی اور جاں بحق ہونے والوں کے لیے دعا مغفرت کی۔

امیر جماعت اسلامی نے کہا کہ جماعت اسلامی اور الخدمت کے زیر انتظام تمام اسپتال زخمیوں کے مفت علاج کے لیے ہر وقت دستیاب ہیں، مظاہرین کے خلاف بلاجواز طاقت کے استعمال اور پولیس کی جانب سے ان پر سیدھی گولیاں چلانے کے عمل کی شدید الفاظ میں مذمت کرتے ہیں۔

سراج الحق نے ٹی ایل پی کو یقین دہانی کراتے ہوئے کہا کہ تحفظ ناموس رسالت کے مسئلے پر جماعت اسلامی مکمل طور پر آپ کے ساتھ ہے۔

امیر جماعت اسلامی سراج الحق نے مزید کہا کہ حکومت ٹی ایل پی کے ساتھ کیے گئے معاہدہ پر عمل درآمد کرتے ہوئے فرانس کے سفیر کو نکالے ، حکومت ٹی ایل پی پر عائد پابندی ختم کرے اور تمام قیدیوں کو فی الفور رہا کیا جائے۔