وزیراعظم عمران خان نے ہدایات جاری کرتے ہوئے کہا ہے کہ معیشت کی پائیدار ترقی کو یقینی بنایا جائے جس سے عوام کو ریلیف میسر آئے۔

تفصیلات کے مطابق وزیرِ اعظم عمران خان کی زیرصدارت اکنامک ایڈوائزری کونسل کا اجلاس منعقد ہوا جس میں وزیراعظم نے ہدایت کی ہے کہ عوام پر مزید ٹیکس لگانے کی بجائے عوام کو ریلیف فراہم کرنے کے لیے آؤٹ آف باکس سلوشنز تجویز کیے جائیں۔

وزیرِ اعظم نے کہا کہ اکنامک ایڈوائرزی کونسل کے قیام کا مقصد ملکی معیشت کو پائیدار بنیادوں پر استوار کرنے کے حوالے سے نامور معاشی ماہرین کی تجاویز سے استفادہ کرنا ہے۔

 وزیرِ اعظم نے کہا کہ حکومتی کوششوں کی بدولت کاروباری فضا بہتر ہوئی اور کاروباری برادری کا اعتماد بحال ہوا ہے ۔

وزیراعظم نے مزید کہا ہے کہ حکومت کی ہر ممکنہ کوشش رہی ہے کہ بزنس کمیونٹی کی مشاورت سے پالیسیاں تشکیل دی جائیں اور ان پالیسیوں کا تسلسل یقینی بنایا جائے۔

وزیراعظم نے اکنامک ایڈوائزری کونسل کو ہدایت کی کہ پائیدار معاشی استحکام و ترقی کے حوالے سے قلیل المدت، وسط مدتی اور کثیر المدتی اقدامات پر مبنی روڈ میپ تجویز کیا جائے تا کہ معیشت کے اہم شعبوں کو مزید منظم کیا جا سکے۔

وزیرِ اعظم نے اس موقع پر ایف بی آر میں جاری اصلاحات کا خاص طور پر ذکر کرتے ہوئے کہا کہ ٹیکسوں کے نظام میں اصلاحات، نظام کو آسان اور فعال بنانا حکومت کی اولین ترجیحات میں شامل ہے ۔